പത്തനംതിട്ട : സാമൂഹിക പ്രവർത്തക ഡോ.എം. എസ് .സുനിൽ ഭവനരഹിതരായ സുരക്ഷിതമല്ലാത്ത സാഹചര്യങ്ങളിൽ കഴിയുന്ന നിരാലമ്പർക്ക് പണിത് നൽകുന്ന 301-മത് സ്നേഹഭവനം മണ്ണടി കന്നിമല സൂര്യ ഭവനിൽ ആതിര അരുണിനും കുടുംബത്തിനും ആയി ചിക്കാഗോ സി .എസ് .ഐ. ചർച്ചിന്റെ സഹായത്താൽ നിർമ്മിച്ചു നൽകി. വീടിൻറെ താക്കോൽദാനവും ഉദ്ഘാടനവും ചർച്ച് അംഗമായ ശാമുവൽ ജോൺസനും സുശീല ജോൺസനും ചേർന്ന് നിർവഹിച്ചു. വർഷങ്ങളായി സ്വന്തമായ ഒരു ഭവനം ഇല്ലാതെ സുരക്ഷിതമല്ലാത്ത സാഹചര്യത്തിൽ ആയിരുന്നു ആതിരയും ഭർത്താവ് അരുണും മൂന്ന് പെൺകുഞ്ഞുങ്ങളും കഴിഞ്ഞിരുന്നത്.
പ്രായമായ അച്ഛനും രോഗികളായ അമ്മയും സഹോദരിയും അടങ്ങുന്നതായിരുന്നു ഇവരുടെ കുടുംബം. അരുൺ കൂലിവേല ചെയ്തു കൊണ്ടുവരുന്ന ചെറിയ വരുമാനം മാത്രമായിരുന്നു ഈ എട്ടംഗ കുടുംബത്തിൻറെ ഏക ആശ്രയം. സ്ഥല പരിമിതി മൂലം രണ്ട് നിലകളിലായി രണ്ട് മുറികളും അടുക്കളയും ഹാളും ശുചിമുറിയും സിറ്റൗട്ടും അടങ്ങിയ വീട് നിർമ്മിച്ചു നൽകുകയായിരുന്നു. ചടങ്ങിൽ വാർഡ് മെമ്പർ ലിന്റോ. വൈ., പ്രോജക്ട് കോഡിനേറ്റർ കെ. പി. ജയലാൽ., സാബു ജോൺ., കുടുംബശ്രീ അംഗങ്ങൾ എന്നിവർ പങ്കെടുത്തു.
