പത്തനംതിട്ട : സാമൂഹിക പ്രവർത്തക ഡോ.എം.എസ്.സുനിൽ ഭവനരഹിതരായ നിര്ദ്ദന കുടുംബങ്ങള്ക്ക് നിർമ്മിച്ചു നൽകുന്ന 380 മത് സ്നേഹഭവനം വര്ക്കല ചെറുന്നിയൂർ ശിവനന്ദവരം ഭവനത്തിൽ ബ്ലഡ് കാൻസർ ബാധിതനായ സുനിൽ കുമാറിനും കുടുംബത്തിനുമായി നല്കി. പുന്നൂസ് തച്ചേട്ട് – പ്രതിഭാ തച്ചേട്ട് ദമ്പതികളുടെ സഹായത്താല് നിര്മ്മിച്ച വീട് ഇവരുടെ മകളുടെ ജന്മ ദിനത്തില് കുടുംബത്തിന് സമ്മാനമായി നല്കുകയായിരുന്നു. പ്രതിഭയുടെ സഹോദരൻ ദീപക് സിറിയക് പീറ്റർ വീടിന്റെ താക്കോൽദാനം നിര്വ്വഹിച്ചു. വർഷങ്ങളായി സ്വന്തമായ ഒരു ഭവനം നിർമ്മിക്കുവാൻ കഴിയാതെ രോഗബാധിതനായ സുനിൽ കുമാർ ഭാര്യയോടും രണ്ട് പെൺകുഞ്ഞുങ്ങളോടും ഒപ്പം കഴിയുകയായിരുന്നു.
തിരുവനന്തപുരം ആർ.സി.സിയിലെ ചികിത്സയിൽ കഴിയുന്ന സുനിൽ കുമാർ നാട്ടുകാരുടെ കാരുണ്യത്താൽ ആണ് ചികിത്സ ചിലവിനുള്ള പണം കണ്ടെത്തുന്നത്. പെൺ മക്കളുടെ വിദ്യാഭ്യാസവും വീട്ടുചിലവുകളും ചികിത്സാ ചിലവുകളുമായി ബുദ്ധിമുട്ടിയിരുന്ന സുനിൽ കുമാറിന്റെ അവസ്ഥ നേരിൽകണ്ട് മനസ്സിലാക്കിയ സുനില് ടീച്ചര് ഇവർക്കായി പ്രതിഭാ പുന്നൂസ് നൽകിയ തുക ഉപയോഗിച്ച് മൂന്ന് മുറികളും അടുക്കളയും ഹാളും ശുചിമുറിയും സിറ്റൗട്ടും അടങ്ങിയ വീട് പണിത് നൽകുകയായിരുന്നു. ചടങ്ങിൽ ചെറുന്നിയൂർ ഗ്രാമപഞ്ചായത്ത് പ്രസിഡന്റ് ശിവകുമാർ, ബ്ലോക്ക് പഞ്ചായത്ത് മെമ്പർ സനിൽ കുമാർ, പ്രോജക്ട് കോഡിനേറ്റർ കെ.പി.ജയലാൽ, സിയാര ചെറുബിം, രത്നകുമാർ, റോബിൻ, കൃഷ്ണൻ, ശിവരാജൻ എന്നിവർ പ്രസംഗിച്ചു.
