തിരുവനന്തപുരം : കോവിഡ് മാനദണ്ഡങ്ങള്‍ക്ക് വിധേയമായി ഓണക്കാലത്ത് യാത്രക്കാരുടെ ആവശ്യം അനുസരിച്ച്‌ കൂടുതല്‍ സര്‍വീസുകള്‍ നടത്താൻ ഒരുങ്ങി കെ.എസ്‌.ആര്‍.ടി.സി. ദീര്‍ഘ ദൂര സര്‍വീസുകള്‍ മുന്‍കൂര്‍ റിസര്‍വേഷന്‍ സൗകര്യവും ഏര്‍പ്പെടുത്തിയിട്ടുണ്ട്. ലോക്ക്ഡൗണ്‍ നിയന്ത്രണങ്ങള്‍ ഒഴിവാക്കിയതിനാല്‍ ഓഗസ്റ്റ് 19 മുതല്‍ 23 വരെ യാത്രാക്കാരുടെ തിരക്കിന് അനുസരിച്ച്‌ കെ.എസ്‌.ആര്‍.ടി.സിയുടെ എല്ലാ ഡിപ്പോകളില്‍ നിന്നും ആവശ്യമായ സര്‍വീസുകള്‍ നടത്താനാണ് തീരുമാനം.
യാത്രക്കാരുടെ എണ്ണം വർധിച്ചാൽ തിരുവനന്തപുരം, ആലപ്പുഴ, എറണാകുളം, തൃശ്ശൂര്‍, പാലക്കാട്, കോഴിക്കോട് തുടങ്ങിയ പ്രധാന യൂണിറ്റുകളില്‍ നിന്നും കൂടുതൽ ദീർഘദൂര ബസ് സര്‍വ്വീസുകള്‍ നടത്തും. ഉത്രാട ദിവസമായ 20 ന് ഹെഡ് ക്വാര്‍ട്ടേഴ്സ് ഡി.റ്റി.ഒ മാര്‍ അതാത് ഹെഡ് ക്വാര്‍ട്ടേഴ്സ് കേന്ദ്രീകരിച്ച്‌ സര്‍വ്വീസുകള്‍ ക്രമീകരിക്കുകയും, പ്രധാനപ്പെട്ട കേന്ദ്രങ്ങളില്‍ ഇന്‍സ്പെക്ടര്‍മാരെ വിന്യസിച്ച്‌ സര്‍വ്വീസുകള്‍ നിയന്ത്രിക്കുകയും ചെയ്യും.
