തൃശ്ശൂര് : ഡിവൈഎഫ്ഐ കുന്നംകുളം ബ്ലോക്ക് സെക്രട്ടറിക്ക് നേരെ വധശ്രമം. ഇന്ന് പുലര്ച്ചെയാണ് കേച്ചേരി സ്വദേശി സൈഫുദിന് വെട്ടേറ്റത്. കൈക്കും കാലിനും ഗുരുതരമായി പരിക്കേറ്റ സൈഫുദിനെ അമല മെഡിക്കല് കോളേജില് പ്രവേശിപ്പിച്ചു. മെഡിക്കല് കോളജിലെ തീവ്ര പരിചരണ വിഭാഗത്തില് ചികിത്സയിലാണിയാള്.
ബൈക്കില് യാത്ര ചെയ്യുകയായിരുന്ന സൈഫുദിനെ ഒരു കൂട്ടം ആളുകള് തടഞ്ഞുനിര്ത്തി വെട്ടിപരിക്കേല്പ്പിക്കുകയായിരുന്നെന്നാണ് സൈഫുദിന് പോലീസിന് നല്കുന്ന മൊഴി. വധശ്രമത്തിന് പിന്നില് എസ്.ഡി.പി.ഐ പ്രവര്ത്തകരാണെന്ന് ഡിവൈഎഫ്ഐ ആരോപിച്ചു. കേച്ചേരിയില് കഴിഞ്ഞ ദിവസം നടന്ന ഗ്രാമോത്സവം പരിപാടിയില് എസ്.ഡി.പി.ഐ പ്രവര്ത്തകര് പങ്കെടുക്കാന് ശ്രമിക്കുകയും ഡിവൈഎഫ്ഐ പ്രവര്ത്തകര് തടയുകയും ചെയ്തിരുന്നു. ഇതിന്റെ പ്രതികാരമാണ് കൊലപാതക ശ്രമമെന്നാണ് ഡിവൈഎഫ്ഐ ആരോപിക്കുന്നത്.
