കൊച്ചി: കോണ്ഗ്രസ് നേതാവും മുന് മന്ത്രിയുമായ വിഎസ് ശിവകുമാറിനെ അനധികൃത സ്വത്ത് സമ്പാദന കേസില് എന്ഫോഴ്സ്മെന്റ് ഡയറക്ടറേറ്റ് ചോദ്യം ചെയ്തു. നോട്ടീസ് നല്കി കൊച്ചി ഓഫീസിലേക്ക് വിളിച്ച് വരുത്തിയാണ് ചോദ്യം ചെയ്തത്. വെകിട്ട് 6.30ന് ചോദ്യം ചെയ്യലിന് ശേഷം പുറത്തിറങ്ങിയ ശിവകുമാര് മാധ്യമങ്ങളോട് പ്രതികരിക്കാന് തയ്യാറായില്ല. യുഡിഎഫ് മന്ത്രിസഭയില് ആരോഗ്യമന്ത്രിയായിരിക്കെ അനധികൃതമായി സ്വത്ത് സമ്പാദിച്ചു എന്ന കേസിലാണ് ശിവകുമാറിനെതിരെ ഇ ഡി അന്വേഷണം പുരോഗമിക്കുന്നത്. ഇതിന്റെ അടിസ്ഥാനത്തിലാണ് ചോദ്യം ചെയ്യലിനായി ഇഡി ഉദ്യോഗസ്ഥര്ക്ക് മുന്പാകെ വി എസ് ശിവകുമാര് ഹാജരായത്.
വിഎസ് ശിവകുമാര് ആരോഗ്യ മന്ത്രിയായിരുന്ന 2011 മുതല് 2016 വരെയുള്ള കാലയളവിലെ സാമ്പത്തിക ഇടപാടുകളും കള്ളപ്പണ ഇടപാടുകളുമാണ് ഇ ഡി അന്വേഷിക്കുന്നത്. ശിവകുമാര് അനധികൃത സ്വത്ത് സമ്പാദിച്ചെന്ന് മുമ്പ് വിജിലന്സ് അന്വേഷണത്തില് കണ്ടെത്തിയിരുന്നു ഇതിന്റെ കൂടി അടിസ്ഥാനത്തിലാണ് ഇഡി അന്വേഷണം തുടങ്ങിയത്. ശിവകുമാറിന്റെ വീട്ടിലും അദ്ദേഹത്തിന്റെ ബിനാമികളെന്ന് സംശയിക്കുന്നവരുടെ വീടുകളിലും ഇഡി പരിശോധന നടത്തിയിരുന്നു.
