ന്യൂഡല്‍ഹി: കോവിഡ് വൈറസ് വ്യാപനത്തിന്റെ രണ്ടാംതരംഗത്തില്‍ പ്രതിസന്ധി നേരിട്ടവര്‍ക്ക് ആശ്വാസ വാര്‍ത്തയുമായി ഇപിഎഫ്‌ഒ. ഇപിഎഫ് വരിക്കാര്‍ക്ക് നിക്ഷേപത്തില്‍നിന്ന് പണം പിന്‍വലിക്കാന്‍ അവസരം നല്‍കി. രണ്ടാമത്തെ തവണയാണ് ഇത്തരത്തില്‍ വരിക്കാര്‍ക്ക് നിക്ഷേപത്തില്‍ നിന്നും പണം പിന്‍വലിക്കാന്‍ അവസരം നല്‍കുന്നത്. പിന്‍വലിക്കുന്ന തുക തിരിച്ചടയ്ക്കേണ്ടതില്ലെന്നാണ് ഇപിഎഫ്‌ഒ വ്യക്തമാക്കുന്നത്.
പ്രധാനമന്ത്രി ഗരീബ് കല്യാണ്‍ യോജന പദ്ധതി പ്രകാരം തൊഴില്‍ മന്ത്രാലയമാണ് പദ്ധതി വീണ്ടും പ്രഖ്യാപിച്ചതായി അറിയിച്ചത്. കോവിഡ് വ്യാപനത്തിന്റെ ആദ്യ തരംഗത്തെ തുടര്‍ന്ന് കഴിഞ്ഞ മാര്‍ച്ചിലാണ് പദ്ധതി ആദ്യമായി പ്രഖ്യാപിച്ചത്. കോവിഡിനെ തുടര്‍ന്നുണ്ടായ പ്രതിസന്ധിയില്‍ വരിക്കാര്‍ക്ക് വലിയ ആശ്വാസമേകിയ നടപടിയായിരുന്നു ഇത്.
അടിസ്ഥാന ശമ്പളം, ഡിഎ എന്നിവ ഉള്‍പ്പടെയുള്ള മൂന്നുമാസത്തെ തുകയ്ക്ക് സമാനമോ അല്ലെങ്കില്‍ ഇപിഎഫിലുള്ള നിക്ഷേപത്തിന്റെ പരമാവധി 75 ശതമാനമോ ഏതാണ് കുറവ് ആ തുകയാണ് പിന്‍വലിക്കാന്‍ കഴിയുക. അപേക്ഷ ലഭിച്ചതിന് ശേഷം മൂന്നുദിവസത്തിനകം പണം ലഭ്യമാക്കണമെന്നാണ് തൊഴില്‍ മന്ത്രാലയം നല്‍കിയിരിക്കുന്ന നിര്‍ദ്ദേശം.
