പത്തനംതിട്ട : സംസ്ഥാനത്ത് റബ്ബര് കര്ഷകര്ക്ക് ആശ്വാസമായി റബ്ബര് വില ഉയര്ന്നപ്പോള് ടാപ്പിംഗ് തൊഴിലാളികളെ കിട്ടാനില്ലാത്തത് പത്തനംതിട്ട ജില്ലയിലെ റബര് കര്ഷകരെ സാരമായി ബാധിക്കുന്നു. 235 മുതല് 254 രൂപ വരെയാണ് സംസ്ഥാനത്ത് നിലവില് തുടരുന്ന റബ്ബര് വില. റബറിന്റെ ഗുണനിലവാരമനുസരിച്ച് വിലയില് മാറ്റം വരുന്നുമുണ്ട്. ഒരു സമയത്ത് വിലയില്ലാതെ വന്നതോടെ ആരും തിരിഞ്ഞു നോക്കാതെ കാടുകയറിയ റബ്ബര് തോട്ടങ്ങള് റബ്ബര് കര്ഷകര് വെട്ടിത്തെളിച്ചെടുത്തപ്പോഴാണ് ടാപ്പിംഗ് തൊഴിലാളികളെ കിട്ടാനില്ലാത്തത് വലിയ വെല്ലുവിളിയായി മാറിയത്. ഒരു സമയത്ത് മലയാളികളായ തൊഴിലാളികളാണ് ടാപ്പിംഗ് ജോലികള് ചെയ്തിരുന്നത് എങ്കില് ഇന്ന് ഇതര സംസ്ഥാന തൊഴിലാളികളാണ് പല മേഖലയിലും ടാപ്പിംഗ് ജോലികള് ചെയ്യുന്നത്.
എന്നാല് വിവിധ കാരണങ്ങളാല് ഇവരില് പലരും സ്വന്തം നാട്ടിലേക്ക് മടങ്ങിയതോടെ ജില്ലയിലെ റബ്ബര് കര്ഷകര്ക്ക് വലിയ തിരിച്ചടിയായി. കോന്നി, റാന്നി, ചിറ്റാര്, സീതത്തോട്, തണ്ണിത്തോട് തുടങ്ങി മലയോര മേഖലകള് കേന്ദ്രീകരിച്ച് കിടക്കുന്നവയാണ് പത്തനംതിട്ട ജില്ലയിലെ റബ്ബര് തോട്ടങ്ങള്. പല തോട്ടങ്ങളും കാടുകയറി കിടക്കുന്നതിനാലും വന മേഖലയോട് ചേര്ന്ന് കിടക്കുന്നതുകൊണ്ടും ടാപ്പിംഗ് ഉള്പ്പെടെയുള്ള ജോലികള് ചെയ്യുവാന് തൊഴിലാളികള് വിമുഖത കാട്ടുന്നതായി തോട്ടമുടമകള് പറയുന്നു. വന്യമൃഗ ആക്രമണം ഭയന്നാണ് തൊഴിലാളികള് പിന്മാറുന്നത്. അതിനാല് പല സ്ഥലങ്ങളിലും തോട്ടം ഉടമകള് നേരിട്ടിറങ്ങി ടാപ്പിംഗ് നടത്തുന്ന സ്ഥിതിയാണ് നിലവിലുള്ളത്. എന്നാല് പല പരിമിതികളും ഇതിനുള്ളതിനാല് ആത്യന്തികമായി കര്ഷകര്ക്ക് നഷ്ടംതന്നെയാണ് സംഭവിക്കുന്നത്.
