തിരുവനന്തപുരം: സ്കൂളില് സൂക്ഷിച്ച ചോദ്യപേപ്പര്‍ മോഷണം പോയതിനെതുടര്‍ന്ന് ഹയര്‍സെക്കന്‍ഡറി പരീക്ഷ മാറ്റി. മലപ്പുറം കുഴിമണ്ണ ഗവ. ഹയര്‍ സെക്കന്‍ഡറി സ്കൂളില് പ്രിന്‍സിപ്പലിന്റെ മുറിയില്‍നിന്നാണ് പേപ്പര്‍ മോഷണം പോയത്. ഒന്നാം വര്‍ഷ ഹയര്‍ സെക്കന്‍ഡറി / വി.എച്ച്‌.എസ്.ഇ ഇംപ്രൂവ്മെന്‍റ് / സപ്ലിമെന്‍ററി പരീക്ഷയുടെ അക്കൗണ്ടന്‍സി വിത്ത് എ.എഫ്.എസ് ചോദ്യപേപ്പറാണ് മോഷണം പോയത്. തുടര്‍ന്ന് വെള്ളിയാഴ്ച നടത്താനിരുന്ന ഈ പരീക്ഷ മാറ്റിവെച്ചതായി ഹയര്‍സെക്കന്‍ഡറി പരീക്ഷ സെക്രട്ടറി അറിയിച്ചു.
പുതുക്കിയ തീയതി പിന്നീട് അറിയിക്കും. മറ്റ് പരീക്ഷകള്‍ക്ക് മാറ്റമില്ല. എന്നാല്‍, ഇതോടൊപ്പം അടുത്ത ദിവസങ്ങളില്‍ നടക്കാനിരിക്കുന്ന ഇംഗ്ലീഷ്, ഇക്കണോമിക്സ് ചോദ്യപേപ്പറും മോഷണം പോയിട്ടുണ്ട്. ഈ വിഷയങ്ങള്‍ക്ക് പകരം ചോദ്യപേപ്പര്‍ എത്തിച്ച്‌ നിശ്ചയിച്ച തീയതിയില്‍തന്നെ പരീക്ഷ നടത്താനാണ് ശ്രമം.
സംഭവത്തില്‍ സ്കൂള് പ്രിന്‍സിപ്പല്‍, രണ്ട് പരീക്ഷ ഡെപ്യൂട്ടി ചീഫ് സൂപ്രണ്ടുമാര്‍, സ്കൂള് വാച്ച്‌മാന്‍ എന്നിവരെ പൊതുവിദ്യാഭ്യാസ ഡയറക്ടര്‍ സസ്പെന്‍ഡ് ചെയ്തു. ചോദ്യപേപ്പര്‍ സൂക്ഷിച്ച സമയത്തും വാച്ച്‌മാന്‍ ഡ്യൂട്ടിക്കുണ്ടായിരുന്നില്ല. ബുധനാഴ്ച രാത്രി ഒന്നരയോടെയാണ് സംഭവം.
മോഷ്ടാവിന്റെ ദൃശ്യങ്ങള്‍ സി.സി.ടി.വിയിലുണ്ട്. മുഖംമൂടി ധരിച്ച്‌ ബൈക്കിലെത്തിയ മോഷ്ടാവ് സ്കൂള് കെട്ടിടത്തിന്റെ എയര്‍ഹോള്‍ വഴിയാണ് കടന്നത്. എയര്‍ ഹോളിലേക്ക് കയറാന്‍ ഡെസ്ക്ക് അടുക്കിവെച്ച നിലയില്‍ കണ്ടെത്തിയിട്ടുണ്ട്. എയര്‍ഹോളില്‍നിന്ന് ചവിട്ടിയിറങ്ങാന്‍ പാകത്തില്‍ ഉള്ളില്‍ ഹുക്കുകളും സ്ഥാപിച്ചിട്ടുണ്ട്. പ്രിന്‍സിപ്പലിന്റെ ഓഫീസ് അലമാര പൊളിച്ചനിലയിലാണ്.
ചോദ്യപേപ്പര്‍ കെട്ടുകള്‍ പൊട്ടിച്ചിട്ടില്ലെന്നാണ് സ്കൂളധികൃതര്‍ പറയുന്നത്. അതേസമയം അലമാര പൊളിക്കുകയും ചില കെട്ടുകള്‍ കൊണ്ടുപോയെന്നുമുള്ള നിഗമനത്തിലാണ് പരീക്ഷ മാറ്റാന്‍ തീരുമാനിച്ചത്. രണ്ടരമണിക്കൂര്‍ മോഷ്ടാവ് ഉള്ളില്‍ ചെലവഴിച്ചിട്ടുണ്ടെങ്കിലും പണമോ മറ്റ് രേഖകളോ നഷ്ടപ്പെട്ടിട്ടില്ല. പ്രിന്‍സിപ്പലിന്റെ പരാതിയില്‍ കൊണ്ടാട്ടി പോലീസ് കേസെടുത്ത് അന്വേഷണം തുടങ്ങി. വിദ്യാഭ്യാസവകുപ്പ് ഉദ്യോഗസ്ഥരും സ്ഥലത്തെത്തി വിവരങ്ങള്‍ ശേഖരിച്ചു.
