തിരുവനന്തപുരം : സാമ്പത്തിക ഇടപാട് ധനകാര്യ സ്ഥാപന ഉടമയും കോണ്ഗ്രസ് പഞ്ചായത്ത് പ്രസിഡന്റ് ബെല്സിയുടെ ഭര്ത്താവുമായ ജയചന്ദ്രന് യുവാവിനെ ക്രൂരമായി മര്ദിച്ചു. പൊഴിയൂര് സ്വദേശി അജിനിനെയാണ് ജയചന്ദ്രന് വടി ഉപയോഗിച്ച് കുളത്തൂര് റോഡരികില് വെച്ച് മര്ദിച്ചത്. മര്ദനത്തെ തുടര്ന്ന് പരിക്കേറ്റ അജിന് നെയ്യാറ്റിന്കര ജനറല് ആശുപത്രിയില് ചികിത്സയിലാണ്.
ബെല്സി അംഗമായ ’പോള്’ എന്ന നിക്ഷേപ പദ്ധതിയിലേക്ക് ജയചന്ദ്രന് അജിനില് നിന്ന് പണം വാങ്ങിയിരുന്നുവെന്നും പണം ലഭിക്കാതായതോടെ തിരികെ ചോദിച്ചതാണ് ജയചന്ദ്രനെ പ്രകോപിപ്പിച്ചതെന്നുമാണ് ആരോപണം. രോഷാകുലനായ ജയചന്ദ്രന് അജിനിന്റെ മുട്ടിന് താഴെ മര്ദിക്കുന്നതും കാലില് നിന്ന് രക്തം ഒഴുകുന്നതുമായ രംഗം സമീപത്തുണ്ടായിരുന്ന നാട്ടുകാരിലാരോ മൊബൈല്ഫോണില് പകര്ത്തുകയായിരുന്നു. ഈ ദൃശ്യങ്ങളാണ് പിന്നീട് പുറത്തായത്. നേരത്തേയും അജിനിന് ജയചന്ദ്രനില് നിന്ന് മര്ദനമേറ്റിരുന്നെന്നും റിപ്പോര്ട്ടുണ്ട്.
അതേസമയം സംഭവത്തില് അജിനിന് പണം നല്കാനില്ലെന്നും മദ്യപിച്ച് വീട്ടില് എത്തി നിരന്തരം ശല്യം ചെയ്യുന്ന ആളാണെന്നും ബെല്സി പറഞ്ഞു. അത്തരത്തില് കതകിന് മുട്ടുകയും മറ്റും ചെയ്തതിനാലാണ് ഭര്ത്താവ് മര്ദിച്ചതെന്നും അവര് പറഞ്ഞു.
