ന്യൂഡല്‍ഹി : മുംബൈ ബഹുനില കെട്ടിടത്തിലുണ്ടായ തീപിടിത്തത്തില്‍ മരിച്ചവരുടെ കുടുംബത്തിന് ധനസഹായം പ്രഖ്യാപിച്ച്‌ പ്രധാനമന്ത്രി നരേന്ദ്രമോദി. ജീവന്‍ പൊലിഞ്ഞവരുടെ കുടുംബത്തിന് രണ്ട് ലക്ഷം രൂപ വീതവും പരിക്കേറ്റവര്‍ക്ക് 50,000 രൂപ വീതവും നല്‍കുമെന്ന് പ്രധാനമന്ത്രി അറിയിച്ചു. പ്രധാനമന്ത്രിയുടെ ദുരിതാശ്വാസനിധിയില്‍ നിന്നാണ് തുക നല്‍കുക. ഇന്ന് രാവിലെ 7 മണിയോടെ മുംബൈ കമലാ ബില്‍ഡിംഗിലാണ് തീപിടുത്തമുണ്ടായത്.
അപകടത്തില്‍ ഏഴ് പേര്‍ മരിക്കുകയും 17 പേര്‍ക്ക് പരിക്കേല്‍ക്കുകയും ചെയ്തിരുന്നു. 20നില കെട്ടിടത്തിനാണ് തീപ്പിടിച്ചത്. 18-ാമത്തെ നിലയില്‍ അഗ്നിബാധ ഉണ്ടാകുകയും മറ്റ് നിലകളിലേക്ക് വ്യാപിക്കുകയുമായിരുന്നു. 13 അഗ്നിശമനസേന യൂണിറ്റുകള്‍ എത്തിയാണ് രക്ഷാദൗത്യം നടത്തിയത്. പരിക്കേറ്റവരെ ഭാട്ടിയ, നായര്‍, കസ്തൂര്‍ബ ആശുപത്രികളില്‍ പ്രവേശിപ്പിച്ചു. ഇവര്‍ അപകടനില തരണം ചെയ്തുവെന്നാണ് വിവരം.
