കണ്ണൂര്: മത്സ്യബന്ധനത്തിന് പോയ കൊല്ലം സ്വദേശിയെ കടലില് കാണാതായി. തലശ്ശേരിയില് നിന്ന് മത്സ്യ ബന്ധനത്തിനായി ബോട്ടില് കടലില് പോയ കൊല്ലം പയറ്റുവിള സ്വദേശി വി.സുരേഷ് കുമാറിനെ (55)യാണ് കാണാതായത്. സുരേഷിന്റെ കൂടെയുണ്ടായിരുന്ന റോയ് ബാബു ഡിക്രൂസിന്റെ പരാതിയില് തീരദേശ പോലീസ് കേസെടുത്തു.
കാര്ത്തിക് , തിരുവനന്തപുരം സ്വദേശി ബാബു, ഡിക്രൂസ് , എന്നിവര്ക്കൊപ്പമാണ് സെപ്റ്റംബര് ഒന്നിന് സുരേഷ് കുമാര് കടലില് പോയത്. രാത്രി പത്ത് മണിയോടെ കടലില് വലയിട്ട് എല്ലാവരും ബോട്ടില് കിടന്നുറങ്ങി. പുലര്ച്ചെ ഉറക്കമുണര്ന്നപ്പോള് സുരേഷ് കുമാറിനെ കാണാനില്ലായിരുന്നു. കോസ്റ്റ് ഗാര്ഡ്, മറൈന് എന്ഫോഴ്സ്മെന്റ് എന്നീ സേനകളുടെ സഹായത്തോടെ കോസ്റ്റല് പോലീസ് തിരച്ചില് തുടങ്ങി.
