തെലങ്കാന: തെലങ്കാനയില് മഹബൂബ്നഗറില് സൂപ്പര്ബൈക്ക് കാറിലിടിച്ചുണ്ടായ അപകടത്തില് രണ്ടു കുട്ടികളുള്പ്പെടെ അഞ്ചുപേര് മരിച്ചു. ബൈക്കില് സഞ്ചരിച്ചിരുന്ന രണ്ടുപേരും കാറിലുണ്ടായിരുന്ന മൂന്നുപേരുമാണ് മരിച്ചത്. മഹബൂബ്നഗര് ബൈപ്പാസില് തിങ്കളാഴ്ച പുലര്ച്ചെ ഒന്നിനാണ് സംഭവം. ഹൈദരാബാദ് സ്വദേശി യാക്കൂബ് അഫ്സല് (25), അര്സിയ ബീഗം (30), ഉജേപ (ഏഴ്), അമര് (രണ്ട്) എന്നിവരാണ് മരിച്ചത്. മറ്റൊരാളെ തിരിച്ചറിഞ്ഞിട്ടില്ല. ഇവരില് യാക്കൂബ് അഫ്സലാണ് ബൈക്ക് ഓടിച്ചിരുന്നത്. യാക്കൂബിന്റെ കൂടെയുണ്ടായിരുന്ന ആളെയാണ് തിരിച്ചറിയാനുള്ളത്. കാര് യാത്രികരാണ് മറ്റുള്ളവര്. ബൈപ്പാസില് കാര് യുടേണ് എടുക്കുന്നതിനിടെ അതിവേഗത്തിലെത്തിയ ഹയബൂസ ബൈക്ക് കാറിന്റെ പിറകില് ഇടിക്കുകയായിരുന്നു.
ബൈക്കിലുണ്ടായിരുന്നവര് സംഭവസ്ഥലത്തു തന്നെ മരിച്ചിരുന്നു. ഗുരുതരമായി പരിക്കേറ്റ കാറിലുണ്ടായിരുന്നവരെ ആശുപത്രിയില് എത്തിച്ചെങ്കിലും ചികിത്സയ്ക്കിടെ ജീവന് നഷ്ടമാവുകയായിരുന്നു. ബൈക്ക് റേസാണ് അപകടത്തിനു പിന്നിലെന്നാണ് പോലീസ് സംശയം. 140 കിലോമീറ്റര് വേഗതയിലെത്തിയ ബൈക്ക് നിയന്ത്രണം നഷ്ടമായതോടെ കാറില് ഇടിക്കുകയായിരുന്നു. ബൈപ്പാസില് രാത്രികാലങ്ങളില് യുവാക്കള് ബൈക്ക് റേസ് നടത്തുക പതിവാണെന്ന് പ്രദേശവാസികള് പറഞ്ഞു. പോലീസ് പട്രോളിങ് നടത്തുകയും സി.സി.ടി.വി ക്യാമറകള് സ്ഥാപിക്കുകയും വേണമെന്നും പ്രദേശവാസികള് വ്യക്തമാക്കി. സംഭവത്തില് ഇതുവരെ പരാതി ലഭിച്ചിട്ടില്ലെന്ന് മഹബൂബ്നഗര് റൂറല് പോലീസ് പറഞ്ഞു.
