തട്ടയിൽ : തട്ടയിൽ വാർഡിലെ ചാങ്ങവീട്ടിൽ മൂലഭാഗത്ത് കാടുകയറിക്കിടന്ന ഭൂമി മണ്ണുമാന്തിയുപയോഗിച്ച് വൃത്തിയാക്കി. 30 വർഷത്തിലധികമായി കാടുകയറിക്കിടന്ന സ്ഥലം പന്തളം തെക്കേക്കര പഞ്ചായത്താണ് കാടുതെളിച്ച് വൃത്തിയാക്കിയത്. തട്ടയിൽ വാർഡിൽ ചാങ്ങവീട്ടിൽ മൂലഭാഗത്ത് ഖാദി ഉത്പന്നങ്ങളുണ്ടാക്കിയിരുന്ന പഴയ കെട്ടിടവും അതിന്റെ മൈതാനവുമാണ് ആരും നോക്കാനില്ലാതെ കാടുകയറി കിടന്നത്. ഉടമസ്ഥാവകാശത്തിൽ തർക്കമുള്ള ഭുമിയായതിനാൽ ആരും ഈ ഭാഗത്തേക്ക് തിരിഞ്ഞുനോക്കിയിട്ടില്ലെന്ന് പഞ്ചായത്തംഗം ബി. പ്രസാദ് കുമാർ പറഞ്ഞു.
തൊട്ടടുത്ത് പ്രവർത്തിക്കുന്ന 54-ാം നമ്പർ അങ്കണവാടിയിലെ കുട്ടികളാണ് കാടുമൂടിയ ഭൂമികൊണ്ട് ബുദ്ധിമുട്ടനുഭവിച്ചിരുന്നത്. എൻഎസ്എസ് വനിതാസമാജം സൗജന്യമായി നൽകിയ സ്ഥലത്താണ് അങ്കണവാടിക്ക് പുതിയ കെട്ടിടം പണിതിട്ടുള്ളത്. 60 സെന്റോളം വരുന്ന സ്ഥലം പഞ്ചായത്ത് പ്രസിഡന്റ് എസ്. രാജേന്ദ്രപ്രസാദ്, പഞ്ചായത്തംഗം ബി. പ്രസാദ് കുമാർ എന്നിവരുടെ നേതൃത്വത്തിൽ മണ്ണുമാന്തിയുപയോഗിച്ച് വൃത്തിയാക്കിയെടുത്തു. ഇവിടം കളിക്കളമായി മാറ്റുന്നതിനുള്ള ശ്രമം ഉണ്ടാകുമെന്ന് ബി. പ്രസാദ് കുമാർ പറഞ്ഞു.
