കോയമ്പത്തൂര് : മലങ്കര യാക്കോബായ സുറിയാനി സഭയുടെ ഡല്ഹി, ബെംഗളൂരു മുന് ഭദ്രാസനാധിപന് മോര് ഒസ്താത്തിയോസ് പത്രോസ് മെത്രാപ്പോലീത്ത (59) കാലം ചെയ്തു. കോയമ്പത്തൂര് കുപ്പുസ്വാമി ആശുപത്രിയില് വച്ചായിരുന്നു കാലം ചെയ്തത്. അസുഖബാധിതനായി ദീര്ഘ നാളായി ചികിത്സയിലായിരുന്നു. കബറടക്ക ശുശ്രൂഷകള് പിന്നീട്. തൃശൂര് ഭദ്രാസനത്തിലെ പെങ്ങാമുക്ക് സെന്റ് പീറ്റേഴ്സ് ആന്ഡ് സെന്റ് പോള്സ് യാക്കോബായ സുറിയാനി പഴയപള്ളി ഇടവകാംഗമാണ്. 1963 നവംബര് 12 ന് കുന്നുകുളം പുലിക്കോട്ടില് കുടുംബത്തില് പരേതനായ പി.സി ചാക്കോയുടെയും സലോമി ചാക്കോയുടെയും മകനായി ജനിച്ചു. സ്കൂള് വിദ്യാഭ്യാസവും കോളജ് വിദ്യാഭ്യാസവും കോയമ്ബത്തൂരിലായിരുന്നു.
കോയമ്പത്തൂര് സെന്റ് മേരീസ് യാക്കോബായ സുറിയാനി പള്ളിയില് അംഗത്വം സ്വീകരിച്ചു. വെട്ടിക്കല് വൈദിക സെമിനാരി റെസിഡന്റ് മെത്രാപ്പോലീത്ത മോര് തെയോഫിലോസ് തോമസ് മെത്രാപ്പോലീത്തയുടെ സെക്രട്ടറിയായി സേവനം അനുഷ്ഠിച്ചു. 1993 ഡിസംബര് 19 ന് കോറൂയോ സ്ഥാനവും 1995 ഓഗസ്റ്റ് 6 ന് കശ്ശീശാ സ്ഥാനവും മോര് തെയോഫിലോസ് തോമസ് മെത്രാപ്പോലീത്തയില് നിന്ന് സ്വീകരിച്ചു. 2006 ജൂലൈ 3 ന് വടക്കന് പറവൂര് സെന്റ് തോമസ് യാക്കോബായ സുറിയാനി പള്ളിയില് വച്ച് ശ്രേഷ്ഠ കാതോലിക്ക ആബൂന് മോര് ബസേലിയോസ് തോമസ് പ്രഥമന് ബാവ മോര് ഒസ്താത്തിയോസ് പത്രോസ് എന്ന നാമത്തില് മെത്രാപ്പോലീത്ത സ്ഥാനത്തേക്ക് ഉയര്ത്തി.
