പത്തനംതിട്ട : നിർമാണം പൂർത്തിയായി നാലുവർഷം കഴിഞ്ഞിട്ടും ട്രാവലേഴ്സ് ലോഞ്ച് തുറന്നു കൊടുത്തില്ല. പത്തനംതിട്ട സ്വകാര്യ ബസ്സ്റ്റാൻഡിന് സമീപമാണ് വിശ്രമകേന്ദ്രം. 2017-ന് പ്രാരംഭ നടപടികൾ ആരംഭിച്ചിരുന്നു. നിർമാണത്തിന് സ്ഥലം ഏറ്റെടുക്കുന്നതിനായി നഗരസഭയുമായി ചർച്ചകൾ തുടങ്ങി. 2019-ൽ നഗരസഭ സ്ഥലം വിട്ടുനൽകി. 2020 ജനുവരി 30-ന് ട്രാവലേഴ്സ് ലോഞ്ചിന്റെ നിർമാണം ആരംഭിച്ചു. മന്ത്രി വീണാ ജോർജിന്റെ ആസ്തിവികസന പദ്ധതിയുടെ ഭാഗമായി 65 ലക്ഷം രൂപ ചെലവിട്ട് 2021 ജനുവരി 30-ന് നിർമാണം പൂർത്തിയാക്കി.
2400 ചതുരശ്രഅടിയാണ് കെട്ടിടത്തിന്റെ വിസ്തീർണം. സ്ത്രീകൾക്ക് പ്രത്യേക വിശ്രമമുറി, ശൗചാലയം, ഭിന്നശേഷിക്കാർക്കുള്ള സൗകര്യം തുടങ്ങിയ സൗകര്യങ്ങളൊരുക്കാൻ ആലോചനയുണ്ടായിരുന്നു. ഭക്ഷ്യവകുപ്പുമായി ചേർന്ന് ഹോട്ടൽ തുടങ്ങാമെന്ന ചർച്ചയും ഇതിനിടെ ഉയർന്നു. എന്നാൽ നാലുവർഷം പിന്നിട്ടിട്ടും കെട്ടിടം സഞ്ചാരികൾക്ക് ഉപയോഗപ്രദമാകുന്ന രീതിയിൽ തുറന്നുകൊടുക്കാൻ അധികൃതർക്ക് കഴിഞ്ഞിട്ടില്ല.
