തിരുവനന്തപുരം : മുഖം രക്ഷിക്കാൻ വേണ്ടിയാണ് കേന്ദ്ര സർക്കാർ പെട്രോൾ ഡീസൽ വില കുറച്ചതെന്ന് ധനമന്ത്രി കെഎൻ ബാലഗോപാൽ. 33 രൂപ വരെ വർധിപ്പിച്ച സ്പെഷ്യൽ എക്സൈസ് ഡ്യൂട്ടിയിൽ നിന്നാണ് ഇപ്പോൾ കേന്ദ്രം 5 രൂപ കുറച്ചിരിക്കുന്നതെന്നും അദ്ദേഹം കൂട്ടിച്ചേർത്തു. കേന്ദ്രം കുറച്ച വിലയ്ക്ക് ആനുപാതികമായി സംസ്ഥാനത്ത് പെട്രോള്, ഡീസല് വില കുറയുമെന്നും മന്ത്രി അറിയിച്ചു. പെട്രോളിനും ഡീസലിനും ഏര്പ്പെടുത്തിയിരിക്കുന്ന എക്സൈസ് ഡ്യൂട്ടിയില് കേന്ദ്ര സര്ക്കാര് ഇളവ് പ്രഖ്യാപിച്ചതോടെയാണ് വിലയില് കുറവ് വന്നത്.
ഇതോടെ പെട്രോളിന് ലീറ്ററിന് 5 രൂപയും ഡീസലിന് 10 രൂപയും കുറയും. പുതിയ വില ഇന്ന് അര്ധരാത്രി മുതല് നിലവില് വരും. രാജ്യവ്യാപക പ്രതിഷേധങ്ങള്ക്കൊടുവിലാണ് സര്ക്കാര് തീരുമാനം. വാറ്റ് നികുതി കുറയ്ക്കാന് സംസ്ഥാനങ്ങളോടും കേന്ദ്രം ആവശ്യപ്പെട്ടു. ഇന്ധന വിലയില് ഈ വര്ഷത്തെ റെക്കോര്ഡ് വര്ധനവിനു ശേഷമാണ് ഇപ്പോള് വില കുറയുന്നത്.
ഒക്ടോബറില് പെട്രോള് ലീറ്ററിന് 7.82 രൂപയും ഡീസല് 8.71 രൂപയുമാണ് കൂടിയത്. ഇതിനു മുന്പ് ഏറ്റവും കൂടുതല് വില വര്ധിച്ചത് ഫെബ്രുവരിയിലാണ്. പെട്രോളിന് 4.87 രൂപയും ഡീസലിന് 5.24 രൂപയും. ഇതിനിടെ ഇന്ധനവില കുറഞ്ഞത് കേരളം ഉള്പ്പെടെയുള്ള സംസ്ഥാനങ്ങളില് നിയമസഭാ തിരഞ്ഞെടുപ്പ് നടന്ന ഏപ്രില് മാസത്തിലും പിന്നീട് സെപ്റ്റംബറിലും.
സെപ്റ്റംബറില് ഡീസലിന് 1.11 രൂപ കുറഞ്ഞതാണ് നിരക്കിലുണ്ടായ ഏറ്റവും വലിയ കുറവ്. ഒരിടവേളയ്ക്കു ശേഷം സെപ്റ്റംബര് 24 മുതലാണ് ഇന്ധന വില കൂടാന് തുടങ്ങിയത്. ഈ വര്ഷം ഇതുവരെയുള്ള വില വര്ധന പെട്രോളിന് 31% ഡീസലിന് 33% ആണ്. കഴിഞ്ഞ 10 മാസത്തിനിടെ പെട്രോളിന് 26.06 രൂപയും ഡീസലിന് 25.91 രൂപയുമാണ് വര്ധിച്ചത്.
