റാന്നി : അട്ടത്തോട് കോളനിയുടെ വികസനത്തിന് ഒരു കോടി രൂപ കൂടി അനുവദിച്ചു. പട്ടിക വർഗ്ഗ വിഭാഗങ്ങൾ താമസിക്കുന്ന കോളനികളുടെ സമഗ്രമായ പുരോഗതിക്കായി പട്ടിക വർഗ്ഗ വികസന വകുപ്പ് നടപ്പാക്കുന്ന സവിശേഷ പദ്ധതിയായ അംബേദ്ക്കർ സെറ്റിൽമെന്റ് പദ്ധതി പ്രകാരമാണ് തുക അനുവദിച്ചത്. അടിച്ചിപ്പുഴ കോളനിക്കും ഇതോടൊപ്പം ഒരു കോടി രൂപ അനുവദിച്ചിട്ടുണ്ട്. ഇരു സ്ഥലങ്ങളിലും ബന്ധപ്പെട്ട ഉദ്യോഗസ്ഥരും ജനപ്രതിനിധികളും കോളനി നിവാസികളും പങ്കെടുക്കുന്ന ഊര് കൂട്ടങ്ങൾ വിളിച്ച് ചേർത്തു നിർവഹണം സംബന്ധിച്ച പദ്ധതി രേഖ തയ്യാറാക്കും.
സംസ്ഥാന നിർമ്മിതി കേന്ദ്രത്തിനാണ് നിർവഹണ ചുമതല. പട്ടിക ജാതി വികസന വകുപ്പ് അംബേദ്‌കർ ഗ്രാമം പദ്ധതിയിൽ ഉൾപ്പെടുത്തി അട്ടത്തോട് കോളനിക്ക് ഒരു കോടി രൂപ അനുവദിച്ചിരുന്നു. രണ്ട്‌ പദ്ധതികളും പൂർത്തിയാകുന്നതോടെ ഏറെ പിന്നോക്കം നിൽക്കുന്ന പട്ടിക വർഗ്ഗ -പട്ടിക ജാതി വിഭാഗത്തിപ്പെട്ടവർ കൂടുതലായി താമസിക്കുന്ന അട്ടത്തോട് കോളനിയുടെ മുഖച്ഛായ തന്നെ മാറും.
