തിരുവനന്തപുരം: ലൈഫ് മിഷന്‍ പദ്ധതിയില്‍ പ്രതിപക്ഷം കാണുന്നത് രാഷ്ട്രീയം മാത്രമാണെന്ന് പൊതുമരാമത്ത് വകുപ്പ് മന്ത്രി ജി. സുധാകരന്‍. വീടുകളെല്ലാം മികച്ച രീതിയിലാണ് നിര്‍മ്മിച്ചിരിക്കുന്നത്. കേന്ദ്രസര്‍ക്കാര്‍ ഫണ്ട് അനുവദിച്ചുവെന്നത് ആരും നിഷേധിച്ചിട്ടില്ല. ലൈഫ് മിഷന്റെ കീഴില്‍ രണ്ട് ലക്ഷം വീടുകളുടെ നിര്‍മ്മാണം പൂര്‍ത്തീകരിച്ചുവെന്ന സര്‍ക്കാര്‍ അവകാശവാദം കളളമാണെന്ന ആരോപണവുമായി പ്രതിപക്ഷ നേതാവ് രമേശ് ചെന്നിത്തല രംഗത്തെത്തിയിരുന്നു.
കഴിഞ്ഞ സര്‍ക്കാര്‍ കാലത്ത് തുടങ്ങി നിസ്സാര പണികള്‍ മാത്രം ബാക്കിയായിരുന്ന 52000 വീടുകളും ചേര്‍ത്താണ് സര്‍ക്കാര്‍ കണക്കെന്ന് പ്രതിപക്ഷ നേതാവ് രമേശ് ചെന്നിത്തല ആരോപിച്ചിരുന്നു. ലൈഫ് മിഷന്‍ പദ്ധതിയിലൂടെ സംസ്ഥാന സര്‍ക്കാര്‍ ആയിരത്തില്‍ താഴെ വീടുകള്‍ മാത്രമാണ് നിര്‍മ്മിച്ചതെന്ന ആരോപണവുമായി കെ.പി.സി വൈസ് പ്രസിഡന്‍റ് കൊടിക്കുന്നില്‍ സുരേഷും രംഗത്തെത്തിയിരുന്നു.
