തിരുവനന്തപുരം : സിപിഎം അച്ചടക്ക നടപടി നേരിട്ട ജി.സുധാകരന് മുഖ്യമന്ത്രി പിണറായി വിജയനെ ഔദ്യോഗിക വസതിയിലെത്തി കണ്ടു. സന്ദര്ശനം മുഖ്യമന്ത്രി ആവശ്യപ്പെട്ടതിനെത്തുടര്ന്നാണ്. സുധാകരനെ തിരുത്തി കൂടെനിര്ത്തണമെന്ന തീരുമാനപ്രകാരമാണിത്. എന്തെങ്കിലും ഉണ്ടെങ്കില് പാര്ട്ടി സെക്രട്ടറിയോട് ചോദിക്കണമെന്ന് സുധാകരന് മുഖ്യമന്ത്രിയെ കണ്ടതിനുശേഷം മാധ്യമപ്രവര്ത്തകരോടു പറഞ്ഞു.
അമ്പലപ്പുഴയിലെ തിരഞ്ഞെടുപ്പ് വീഴ്ചയിലാണ് ജി.സുധാകരന് പരസ്യശാസന. സിപിഎം സംസ്ഥാനസമിതിയിലാണ് അച്ചടക്ക നടപടി തീരുമാനിച്ചത്. അമ്പലപ്പുഴയിലെ പ്രചാരണത്തില് ജി.സുധാകരന് മനസര്പ്പിച്ചില്ല. എച്ച്.സലാമിനെ പരാജയപ്പെടുത്താന് സുധാകരന് ശ്രമിച്ചില്ല. എന്നാല് നേതാവിന്റെതായ ഇടപെടല് വിജയത്തിനായി ഉണ്ടായില്ല.
സ്ഥാനാര്ഥിത്വം ലഭിക്കുമെന്ന് സുധാകരന് പ്രതീക്ഷിച്ചു. മാറ്റം ഉള്ക്കൊണ്ട് പ്രവര്ത്തിച്ചില്ല. സംസാരത്തിലും ശരീരഭാഷയിലും അസംതൃപ്തി പ്രകടമാക്കി. ജി.സുധാകരനെതിരായ സിപിഎം റിപ്പോര്ട്ടില് പറയുന്നു. നിലപാടുകള് സംസ്ഥാനസമിതി അംഗത്തിന് യോജിച്ചവിധമായില്ലെന്നുമാണ് വിലയിരുത്തല്. തന്റെ ഭാഗത്ത് വീഴ്ചയില്ലെന്ന് സംസ്ഥാന സമിതിയില് ജി.സുധാകരന് പറഞ്ഞു.