കൊട്ടാരക്കര : പൗരത്വഭേദഗതി സംബന്ധിച്ച ജനങ്ങളുടെ ആശങ്കയകറ്റാനുള്ള ഉത്തരവാദിത്വം കേന്ദ്ര സര്ക്കാരിനുണ്ടെന്ന് എന്.എസ്.എസ്. ജനറല് സെക്രട്ടറി ജി.സുകുമാരന് നായര് . കൊട്ടാരക്കര എന്.എസ്.എസ്. താലൂക്ക് യൂണിയന് ഓഫീസില് സമുദായാചാര്യന് മന്നത്ത് പദ്മനാഭന്റെ വെങ്കലപ്രതിമ അനാവരണവും പദ്മ കഫെ ഉദ്ഘാടനവും നിര്വഹിക്കുകയായിരുന്നു അദ്ദേഹം. പൗരത്വഭേദഗതിയില് ഇപ്പോഴുണ്ടായ ആശങ്കയകറ്റാനുള്ള ഉത്തരവാദിത്വം കേന്ദ്രസര്ക്കാരിനുണ്ട്. അവര് അത് നിഷ്പക്ഷമായി നിറവേറ്റിയാല് മാത്രമേ ഭരണഘടനയില് പറയുന്ന മതേതരത്വവും തുല്യതയും ഉറപ്പുവരുത്താന് സാധിക്കുകയുള്ളൂ.
വിവാദമായ വിഷയങ്ങള് ഭരണഘടനാനുസൃതമല്ലെങ്കില് അതു തീരുമാനിക്കേണ്ടതും മാറ്റേണ്ടതും കോടതിയാണ്. ഈ വിഷയം ചിലര്ക്ക് ഭരണം ഉറപ്പിക്കുന്നതിനോ മറ്റുള്ളവര്ക്ക് രാഷ്ട്രീയ മുതലെടുപ്പ് നടത്തുന്നതിനോ അവസരമൊരുക്കുന്നത് രാജ്യത്തിന്റെ അഖണ്ഡതയ്ക്ക് ഭീഷണിയായിത്തീരും. സമാധാനപരമായി പ്രതിഷേധിക്കാന് ആര്ക്കും അവകാശമുണ്ട്. പക്ഷേ, അക്രമം ആരുടെ ഭാഗത്തുനിന്നുണ്ടായാലും അത് ഒന്നിനും പരിഹാരമല്ല. രാജ്യത്തിന് ദോഷകരമാവുകയേയുള്ളൂവെന്നാണ് എന്.എസ്.എസിന്റെ നിലപാട്.
