കോന്നി : കോന്നിയിൽ വാഹനാപകടത്തിൽ തമിഴ്നാട് സ്വദേശി സ്വദേശിയായ പെൺകുട്ടി മരിച്ചു. കഴിഞ്ഞ ദിവസം രാത്രി പതിനൊന്നരയോടെ കോന്നി മാമൂട്ടിലാണ് അപകടം നടന്നത്. വിനോദ യാത്ര കഴിഞ്ഞ് തെങ്കാശിയിലേക്ക് പോയ കാറും എതിരെ വന്ന ട്രക്കും തമ്മിൽ കൂട്ടിയിടിക്കുകയായിരുന്നു. സംഭവത്തിൽ സംഘത്തിൽ ഉണ്ടായിരുന്ന വിഘ്നേശാ സന്ധ്യ (12) ആണ് മരണപ്പെട്ടത്. സംഘത്തിൽ ഉണ്ടായിരുന്ന ആദികേശവൻ (23), മാരിസെൽവൻ(39), അന്നലക്ഷ്മി (35), കാർത്തിക (33), ആധവൻ(13), ആരീഷ് (6), മഗീഷ് (8), ആരുണ്യ(5), പെരിയസ്വാമി (46) എന്നിവർക്കാണ് പരിക്കേറ്റത്.
അപകടത്തിൽ കാർ ഭാഗികമായി ലോറിയുടെ മുൻ ഭാഗവും തകർന്നു. കാർ ഡ്രൈവർ ഉറങ്ങിപോയതാണ് അപകടത്തിന് കാരണം എന്ന് കരുതുന്നു. കോന്നി അഗ്നി രക്ഷാ സേനയും പോലീസും നാട്ടുകാരും ചേർന്നാണ് രക്ഷാപ്രവർത്തനം നടത്തിയത്. അപകടത്തിൽ പരിക്കേറ്റവരെ പത്തനംതിട്ടയിലെ സ്വകാര്യ ആശുപത്രിയിലേക്ക് മാറ്റി. പെൺകുട്ടിയുടെ മൃതദേഹം കോന്നി മെഡിക്കൽ കോളേജിൽ പോസ്റ്റ്മോർട്ടം നടപടികൾക്ക് ശേഷം ബന്ധുക്കൾക്ക് വിട്ടുനൽകും.
