മലപ്പുറം : കരിപ്പൂര്‍വിമാനത്താവളത്തില്‍ 75ലക്ഷത്തിന്റെ സ്വര്‍ണം പിടികൂടി. കരിപ്പൂര്‍ വിമാനത്താവളത്തില്‍ 75 ലക്ഷം വിലവരുന്ന 1.39 കിലോ സ്വര്‍ണമാണ് കോഴിക്കോട് കസ്റ്റംസ് പ്രിവന്റീവ് വിഭാഗം കണ്ടെത്തിയത്. ഷാര്‍ജയില്‍ നിന്നെത്തിയ കാസര്‍കോട് സ്വദേശി ഷകിബ് അഹമ്മദില്‍ നിന്ന് 357 ഗ്രാം സ്വര്‍ണം കംസ്റ്റംസ് പിടിച്ചെടുത്തു. ഡോര്‍ ലോക്കിനുള്ളില്‍ ഒളിപ്പിച്ച നിലയിലായിരുന്നു സ്വര്‍ണക്കട്ടി.
ബഹ്‌റൈനില്‍ നിന്നെത്തിയ അബ്ദുല്‍ ആദില്‍ ഒരു കിലോ 22 ഗ്രാം സ്വര്‍ണ്ണ മിശ്രിതമാണ് ശരീരത്തില്‍ ഒളിപ്പിച്ച്‌ കടത്താന്‍ ശ്രമിച്ചത്. കോഴിക്കോട് കസ്റ്റംസ് പ്രിവന്റീവ് ഡിവിഷന്‍ അസിസ്റ്റന്റ് കമ്മീഷണര്‍ സിനോയ് കെ.മാത്യുവിന്റെ നേതൃത്വത്തില്‍ സൂപ്രണ്ടുമാരായ പ്രവീണ്‍ കുമാര്‍, പ്രകാശ് എന്നിവരടങ്ങുന്ന സംഘമാണ് സ്വര്‍ണക്കടത്ത് പിടികൂടിയത്.
