തിരുവനന്തപുരം: കേരളത്തിലെ ചിലര് രാവും പകലും സ്വര്ണം കടത്തുകയാണെന്ന യുവം വേദിയിലെ മോദിയുടെ പരമാര്ശത്തിനെതിരെ സിപിഎം കേന്ദ്ര കമ്മറ്റി അംഗം ഡോ.തോമസ് ഐസക് രംഗത്ത്. പ്രധാനമന്ത്രി മോദി ഇതിലേറെ തറനിലയിലേക്ക് തരംതാഴാമോയെന്ന് അദ്ദേഹം ചോദിച്ചു. സ്വര്ണ്ണ കള്ളക്കടത്തിനെ തടയേണ്ട കസ്റ്റംസും അവരെ വെട്ടിച്ച് സ്വര്ണ്ണം കടത്തിയാല് പിടിക്കേണ്ട എന്ഫോഴ്സ്മെന്റ് ഡയറക്ടറേറ്റും കേന്ദ്ര സര്ക്കാരിന്റെ ഏജന്സികളല്ലേ? നിങ്ങളുടെ വീഴ്ചയാണ് കള്ളക്കടത്ത് എന്നത് ആദ്യം മോദി സമ്മതിക്കുക. എന്നിട്ടു മറ്റുള്ളവരെ കുറ്റം പറയുകയെന്ന് അദ്ദേഹം ഫേസ്ബുക്കില് കുറിച്ചു
അതേസമയം സ്വര്ണക്കടത്ത് ആരോപണങ്ങളില് പ്രധാനമന്ത്രി നരേന്ദ്ര മോദിക്കെതിരെ കെ ടി ജലീലും രംഗത്ത് എത്തിയയിരുന്നു. അദാനിയുടെയും അംബാനിയുടെയും കടത്തോളം വരുമോ മോദിജീ കേരളത്തിലെ സ്വര്ണ്ണക്കള്ളക്കടത്തെന്ന് കെ ടി ജലീല് ഫേസ്ബുക്ക് കുറിപ്പില് ചോദിച്ചു. സ്വര്ണ്ണക്കള്ളക്കടത്ത് രാവും പകലും നടക്കുന്നുണ്ടെങ്കില് അത് പിടിക്കാനല്ലേ കേന്ദ്ര സര്ക്കാരിന്റെ കസ്റ്റംസ് ഉള്പ്പടെയുള്ള സംവിധാനങ്ങള്. അവര്ക്ക് സ്വര്ണം കടത്തുന്നത് കണ്ടെത്താന് കഴിയുന്നില്ലെങ്കില് ആ വകുപ്പുകള് പിരിച്ചുവിട്ട് ‘ശേഷി’യുള്ളവരെ ചുമതല ഏല്പ്പിക്കണമെന്നും ജലീല് വ്യക്തമാക്കി.
