ചെങ്ങന്നുർ : ചെങ്ങന്നൂർ ഗവ. ജില്ലാ ആശുപത്രിയിൽ രോഗിയോടൊപ്പം എത്തുന്നവര്ക്ക് പൊരിവെയിലില് നില്ക്കാന് വിധി. മാതൃ -ശിശു വിഭാഗം ജില്ലാ ആശുപത്രിയിൽ ദിനംപ്രതി നിരവധി അമ്മമാർ കുട്ടികളുമായി എത്തുന്നു. ഇവരോടൊപ്പം സഹായത്തിന് എത്തുന്നവർ കെട്ടിടത്തിന് വെളിയിലാണ് നിൽക്കേണ്ടത്.
വാഹനങ്ങൾ പാർക്ക് ചെയ്യാനും ടീസ്റ്റാൾ നടത്താനും സൗകര്യം ഏർപ്പെടുത്തിയപ്പോൾ കൂടെ സഹായത്തിന് എത്തുന്നവർക്ക് ഒരു സൗകര്യവും ഒരുക്കിയിട്ടില്ല. ഇവിടെ വാഹനങ്ങൾ പാർക്ക് ചെയ്യുന്നതിന്റെ ഒരുഭാഗത്തായി സ്റ്റേജിനായി തറ കെട്ടിയിട്ടിരിക്കുന്നിടത്ത് ഷീറ്റിട്ട് കസേരകൾ ഇട്ടാൽ മഴയും വെയിലും കൊള്ളാതെ ആളുകൾക്ക് ഇരിപ്പിടം ഒരുക്കാവുന്നതാണ്. എന്നാൽ അധികൃതർ ഇതിനായി ഒരു നടപടിയും സ്വീകരിക്കുന്നില്ല.