പത്തനംതിട്ട : കൃഷി – പൂന്തോട്ട നിർമ്മാണ രീതികളെ സംയോജിപ്പിച്ച് നടപ്പിലാക്കുന്ന ഫുഡ് സ്കേപ്പിംഗിന് തുടക്കം കുറിക്കുകയാണ് പത്തനംതിട്ട നഗരസഭയിലെ ഹരിതകര്‍മ്മസേന. ജൈവജ്യോതി എന്ന പേരിൽ കളക്ടറേറ്റ് വളപ്പിൽ ആരംഭിക്കുന്ന പദ്ധതി നഗരസഭാ ചെയർമാൻ അഡ്വ.ടി സക്കീർ ഹുസൈൻ ഉദ്ഘാടനം ചെയ്യും. ജില്ലാ കളക്ടർ എസ് പ്രേംകൃഷ്ണൻ ഐഎഎസ് മുഖ്യാതിഥി ആകും. ഭക്ഷ്യയോഗ്യമായ വിളവ് ലഭിക്കുന്ന സസ്യങ്ങൾ ഉപയോഗിച്ച് തയ്യാറാക്കുന്ന പോഷക – പൂന്തോട്ട നിർമ്മാണമായ ഫുഡ് സ്കേപ്പിംഗ് നഗരത്തിന് പരിചയപ്പെടുത്തുക കൂടിയാണ് ഹരിത കർമ്മ സേന. ആദ്യഘട്ടമായി ജൈവ മഞ്ഞൾ കൃഷിയാണ് കളക്ടറേറ്റ് വളപ്പിൽ ആരംഭിക്കുന്നത്. കളക്ടറേറ്റ് ഉൾപ്പെടെയുള്ള ഓഫീസ് സമുച്ചയങ്ങളില്‍ നിന്നും ശേഖരിച്ച ജൈവമാലിന്യത്തിൽ നിന്ന് തയ്യാറാക്കിയ പാം ബയോ ഗ്രീന്‍ മാന്വർ എന്ന സ്വന്തം ജൈവവളമാണ് കൃഷിക്ക് ഉപയോഗിക്കുന്നത്. കാതോലിക്കേറ്റ് കോളേജിലെ എൻ എസ് എസ് യൂണിറ്റും പദ്ധതിയുടെ ഭാഗമാകും.
വിളവെടുക്കുന്ന ജൈവ മഞ്ഞള്‍ കൊണ്ട് ഉപോല്പന്നങ്ങള്‍ ഉണ്ടാക്കി പൊതു മാര്‍ക്കറ്റ് വഴിയും കുടുംബശ്രീ ഓണ്‍ലൈന്‍ പ്ലാറ്റ്ഫോം വഴിയും പൊതുജനങ്ങള്‍ക്ക് എത്തിക്കുക എന്നതാണ് ഹരിത കര്‍മ്മ സേന ഉദ്ദേശിക്കുന്നത്. സ്വന്തം ബ്രാൻഡിൽ ജൈവവളം വിപണിയിൽ എത്തിക്കുന്നതിൽ വിജയം വരിച്ച നഗരസഭയിലെ ഹരിത കർമ്മ സേനയുടെ മറ്റൊരു അഭിമാന പദ്ധതിയാണ് ജൈവ ജ്യോതി ഫുഡ് സ്കേപ്പിംഗ്. അംഗങ്ങളുടെ വരുമാന വർദ്ധനയെക്കാൾ ഉപരിയായി നഗര ജീവിതത്തിൽ സ്വീകരിക്കേണ്ട മികച്ച മാതൃകകൾ നാടിന് പരിചയപ്പെടുത്തുക കൂടിയാണ് നഗരസഭയിലെ ഹരിത കർമ്മ സേന എന്ന് ചെയർമാൻ അഡ്വ.ടി സക്കീർ ഹുസൈൻ പറഞ്ഞു. ഇന്ന് (21) രാവിലെ 10 ന് നടക്കുന്ന ചടങ്ങിൽ നഗരസഭാ കൃഷി – വികസന സ്റ്റാൻഡിങ് കമ്മിറ്റി ചെയർമാൻ കെ ആർ അജിത് കുമാർ, ആരോഗ്യ സ്റ്റാൻഡിങ് കമ്മിറ്റി ചെയർമാൻ ജെറി അലക്സ്, വാർഡ് കൗൺസിലർ സിന്ധു അനിൽ, ജോയിന്റ് ഡയറക്ടർ നൈസാം എസ്, കാതോലിക്കേറ്റ് കോളേജ് എൻഎസ്എസ് യൂണിറ്റ് കോഡിനേറ്റർ ഡോ.ഗോകുൽ ജി നായർ തുടങ്ങിയവർ പങ്കെടുക്കും.
