കോന്നി : പത്തനംതിട്ട മൂഴിയാര് ആദിവാസി ഉന്നതിയില് പ്രസവ വേദനയെ തുടര്ന്ന് ഗുരുതരാവസ്ഥയിലായ ആദിവാസി യുവതി കോന്നി മെഡിക്കല് കോളേജില് ആണ് കുഞ്ഞിന് ജന്മം നല്കി. ആരോഗ്യ വകുപ്പ് അധികൃതരും കെ.എസ്.ഇ.ബി ജീവനക്കാരും ചേര്ന്ന് കൃത്യ സമയത്ത് കോന്നി മെഡിക്കല് കോളേജില് എത്തിച്ചതിനെ തുടര്ന്നാണ് അമ്മയും കുഞ്ഞും അപകടനില തരണം ചെയ്തത്. കഴിഞ്ഞ ദിവസം രാത്രി 11 മണിയോടെ പ്രസവ വേദന അനുഭവപ്പെട്ടതിനെ തുടര്ന്ന് സ്ഥലത്തെ ജൂനിയര് പബ്ലിക് ഹെല്ത്ത് നഴ്സിനെ വിവരം ധരിപ്പിക്കുകയും അവിടെ നിന്നും യുവതിയെ കെ.എസ്.ഇ ബി ആംബുലന്സില് സീതത്തോട്ടില് എത്തിക്കുകയുമായിരുന്നു.
സീതത്തോട് കുടുംബാരോഗ്യ കേന്ദ്രത്തിലെ മെഡിക്കല് ഓഫീസര് ഡോ.പ്രശോഭ്, ഡോ.അലന് എന്നിവരുടെ നിര്ദേശ പ്രകാരം സീതത്തോട് കുടുംബാരോഗ്യ കേന്ദ്രത്തിന്റെ ഐ.സി.യു ആംബുലന്സുമായി ഡ്രൈവര് ജോമോന് എത്തുകയും ജൂനിയര് പബ്ലിക് ഹെല്ത്ത് നഴ്സ്മാരായ ദീപ്തി എം ദിനേശ്, രഞ്ജിനി.വി.രാജന് എന്നിവര് ചേര്ന്ന് സീതത്തോട് ആല്ഫ മെഡിക്കല് സെന്ററിലും തുടര്ന്ന് പത്തനംതിട്ട ജനറല് ആശുപത്രിയിലും പിന്നീട് കോന്നി മെഡിക്കല് കോളേജിലും എത്തിക്കുകയായിരുന്നു. കോന്നി മെഡിക്കല് കോളേജിലെ ഗൈനക്കോളജി വിഭാഗം ഡോക്ടര് അംബികയുടെ നേതൃത്വത്തില് നടന്ന പരിചരണത്തില് പുലര്ച്ചെ മൂന്നു മണിയോടെ യുവതി ആണ് കുഞ്ഞിന് ജന്മം നല്കുകയും ചെയ്തു. അമ്മയും കുഞ്ഞും സുഖമായി ഇരിക്കുന്നതായി കോന്നി മെഡിക്കല് കോളേജ് അധികൃതര് പറഞ്ഞു.
