തിരുവനന്തപുരം : ഉന്നതവിദ്യാഭ്യാസ രംഗത്ത് മികവിന്റെ കേന്ദ്രങ്ങള് വളര്ത്തിയെടുക്കാന് കേരളം നടത്തുന്ന ശ്രമങ്ങള്ക്ക് പിന്തുണ നല്കുമെന്ന് നെതര്ലന്റസ് അംബാസിഡര് മാര്ട്ടെന് വാന്ഡെന് ബെര്ഗ്സ് പറഞ്ഞു. മുഖ്യമന്ത്രിയുമായി ഇന്ന് നടത്തിയ കൂടിക്കാഴ്ചയിലാണ് അദ്ദേഹം ഇക്കാര്യം പറഞ്ഞത്. കേരളത്തിന്റെ ഉന്നതവിദ്യാഭ്യാസം നവീകരണത്തിന്റെ പാതയിലാണ്. നെതര്ലന്റിസിലെ സാങ്കേതിക സര്വ്വകലാശാലകളുമായി കൂടുതല് മികച്ച രീതിയില് സഹകരിക്കാന് അവസരം ഉണ്ടാകണം. കേരളവും നെതര്ലന്റസുമായി നിലനില്ക്കുന്ന അക്കാദമിക സഹകരണത്തിന്റെ സുദീര്ഘമായ ചരിത്രം കൂടിക്കാഴ്ചയില് ഓര്മ്മിപ്പിച്ചു.
കേരളത്തിന്റെ വ്യവസായ മേഖലയില് ഡച്ച് കമ്പനികളുടെ കൂടുതല് നിക്ഷേപം കൊണ്ടുവരണമെന്ന അഭ്യര്ത്ഥന അദ്ദേഹം സ്വീകരിച്ചു. നെതര്ലന്റസിലെ വിനോദ സഞ്ചാരികളെ കേരളത്തിലേക്ക് സ്വാഗതം ചെയ്തു. 2018ലെ പ്രളയത്തിനു ശേഷം നെതര്ലന്റിസില് നിന്നും ലഭിച്ച നിര്ദേശങ്ങളും സഹായങ്ങളും ദുരന്ത നിവാരണ രംഗത്ത് കേരളത്തിനു മുതല്ക്കൂട്ടായി മാറിയെന്ന് അഭിപ്രായപ്പെട്ടു. റൂം ഫോര് റിവര് പദ്ധതി കുട്ടനാട് മേഖലയില് പ്രളയ സാഹചര്യങ്ങള് കൈകാര്യം ചെയ്യുന്നതില് വലിയ മുന്നേറ്റമാണ് ഉണ്ടാക്കിയത്.
പഴവര്ഗങ്ങളുടെയും പുഷ്പങ്ങളുടെയും കൃഷിയിലും മൂല്യവര്ദ്ധനവിനും ആവശ്യമായ ആധുനിക സാങ്കേതികതകള് വികസിപ്പിക്കുന്ന മികവിന്റെ കേന്ദ്രങ്ങള് നെതര്ലന്റസ് സഹകരണത്തോടെ വയനാട് അമ്പലവയവയലില് ആരംഭിച്ചിട്ടുണ്ട്. കൃഷി, ജല വിഭവം, സാങ്കേതിക വിദ്യാഭ്യാസം, കാലാവസ്ഥാ പ്രശ്നങ്ങള് തുടങ്ങിയ മേഖലകളില് നെതര്ലന്റസ് സംഘം സഹകരണം വാഗ്ദാനം ചെയ്തു.
ഉപ്പുവെള്ള കൃഷി, പാലുല്പാദനം, മൃഗസംരക്ഷണം തുടങ്ങിയ മേഖലകളില് സഹകരിക്കും. നെതര്ലന്റസ് സാമ്പത്തിക ഉപദേഷ്ടാവ് ജൂസ്റ്റ് ഗീജര്, നെതര്ലന്റസ് ഇന്ഫ്രാസ്ട്രക്ചര് ആന്ഡ് വാട്ടര് റിസോഴ്സസ് മന്ത്രാലയം സീനിയര് പോളിസി ഓഫീസര്, ലൂയിറ്റ്ജാന് ഡിഖൂയിസ്, ബാംഗ്ലൂരിലെ ഡെപ്യൂട്ടി കോണ്സല് ജനറല് ഹെയ്ന് ലഗെവീന് എന്നിവരും അംബാസിഡര്ക്കൊപ്പം ഉണ്ടായിരുന്നു.
