ബംഗളൂരു : ശിരോവസ്ത്ര വിവാദത്തിന്റെ മറവില്‍ കര്‍ണാടകയിലെ മുസ്ലിം വിദ്യാര്‍ഥികളുടെ വിവരം സര്‍ക്കാര്‍ ശേഖരിക്കുന്നു. സ്വകാര്യ – സര്‍ക്കാര്‍ വിദ്യാലയങ്ങളിലെ മുസ്ലിം വിദ്യാര്‍ഥികളെക്കുറിച്ചുള്ള വിവരങ്ങളാണ് ശേഖരിക്കുന്നത്. ഹൈകോടതിയില്‍ ശിരോവസ്ത്രവുമായി ബന്ധപ്പെട്ട ഹര്‍ജിയില്‍ വാദം നടക്കുന്ന പശ്ചാത്തലത്തില്‍ നിയമസഭയില്‍ ജനപ്രതിനിധികള്‍ ആവശ്യപ്പെട്ടാല്‍ നല്‍കാനാണ് വിവരശേഖരണമെന്നാണ് വിദ്യാഭ്യാസ വകുപ്പ് ഉദ്യോഗസ്ഥരുടെ ന്യായീകരണം. ശിരോവസ്ത്രം നിഷേധിക്കുന്നതിന്റെ പേരില്‍ വിദ്യാലയങ്ങളില്‍നിന്ന് വീട്ടിലേക്ക് മടങ്ങുന്ന വിദ്യാര്‍ഥികളുടെ എണ്ണം സംബന്ധിച്ച്‌ വ്യക്തത വരുത്താനാണ് വിവരം ശേഖരിക്കുന്നതെന്നുമായിരുന്നു പ്രൈമറി ആന്‍ഡ് സെക്കന്‍ഡറി വിദ്യാഭ്യാസ മന്ത്രി ബിസി. നാഗേഷിന്റെ പ്രതികരണം.
എന്നാല്‍, ശിരോവസ്ത്ര സമരത്തിന്റെ പശ്ചാത്തലത്തില്‍ മുസ്ലിം വിദ്യാര്‍ഥികളുടെ പ്രാതിനിധ്യം കണക്കാക്കി കോളജുകളെ സെന്‍സിറ്റിവ് മേഖലയില്‍ ഉള്‍പ്പെടുത്തുന്നതിന് മുന്നോടിയായാണ് നടപടിയെന്നാണ് വിവരം. ഹൈകോടതിയുടെ ഇടക്കാല ഉത്തരവിന് പിന്നാലെ ശിരോവസ്ത്രത്തിന്റെ പേരില്‍ സംസ്ഥാനത്തെ 14 വിദ്യാലയങ്ങളിലായി 162 വിദ്യാര്‍ഥികളെ വീട്ടിലേക്ക് മടക്കിയതായാണ് പൊതുവിദ്യാഭ്യാസ വകുപ്പിന്റെ കണക്ക്. അതേസമയം, വിദ്യാര്‍ഥി പ്രതിഷേധത്തെ ചുരുക്കിക്കാട്ടുന്നതാണ് സര്‍ക്കാര്‍ കണക്ക്.
