കൊച്ചി: നിയമസഭാംഗമായി അര നൂറ്റാണ്ട് പൂര്ത്തിയാക്കിയ ഉമ്മന് ചാണ്ടിക്ക് അഭിവാദ്യങ്ങള് അര്പ്പിച്ചുകൊണ്ട് കൊച്ചി കായലില് കൂറ്റന് ബാനര് സ്ഥാപിച്ച് കെ.എസ്.യു, യൂത്ത് കോണ്ഗ്രസ് പ്രവര്ത്തകര്.
100 അടി നീളവും ആറ് അടി വീതിയും ഉള്ള ബാനറാണ് കായലോളങ്ങള്ക്കൊപ്പം ഒഴുകിയത്. തമ്മില് ബന്ധിപ്പിച്ച 10 ഇന്ലാന്ഡ് വള്ളങ്ങളിലായി പ്രവര്ത്തകര് അണിനിരന്നു.
മറൈന് ഡ്രൈവില് മഴവില് പാലത്തിന് അഭിമുഖമായി കായലില് വാദ്യമേളങ്ങളുടെ അകമ്ബടിയോടെ മുദ്രാവാക്യങ്ങള് മുഴക്കി പ്രവര്ത്തകര് ഒരുമണിക്കൂറോളം നിലയുറപ്പിച്ചു. ഡി.സി.സി പ്രസിഡന്റ് ടി.ജെ. വിനോദ് എം.എല്.എ ഉദ്ഘാടനം ചെയ്ത ചടങ്ങ് കെ.പി.സി.സി സെക്രട്ടറി ടോണി ചമ്മണി ഫ്ലാഗ് ഓഫ് ചെയ്തു.
ഡി.സി.സി ജനറല് സെക്രട്ടറി വി.കെ. തങ്കരാജ്, കെ.എസ്.യു സംസ്ഥാന മുന് സെക്രട്ടറി ജോണ്സണ് മാത്യു, യൂത്ത് കോണ്ഗ്രസ് സംസ്ഥാന സെക്രട്ടറി ദീപക് ജോയി, കെ.എസ്.യു ജില്ല പ്രസിഡന്റ് അലോഷ്യസ് സേവ്യര്, നഗരസഭ കൗണ്സിലര്മാരായ ജോസഫ് അലക്സ്, എം.ജി. അരിസ്റ്റോട്ടില്, വിജയകുമാര് തുടങ്ങിയവര് സംസാരിച്ചു.
ഉമ്മന് ചാണ്ടിയുടെ നിയമസഭാംഗത്വ സുവര്ണ ജൂബിലി ആഘോഷങ്ങളുടെ ജില്ലതല ഉദ്ഘാടനം ടി.ജെ. വിനോദ് എം.എല്.എ നിര്വഹിച്ചു.
കോട്ടയത്ത് നടന്ന ആഘോഷങ്ങളുടെ തത്സമയ ദൃശ്യങ്ങള് ഡി.സി.സി ഓഫിസിന് മുന്നില് പ്രദര്ശിപ്പിച്ചു.
മുന് മന്ത്രി ഡൊമിനിക് പ്രസേന്റഷന്, കെ.പി.സി.സി സെക്രട്ടറിമാരായ ടോണി ചമ്മണി, എം.ആര്. അഭിലാഷ്, ഡി.സി.സി ഭാരവാഹികളായ മുഹമ്മദ് ഷിയാസ്, പി.ഡി. മാര്ട്ടിന്, കെ.വി.പി. കൃഷ്ണകുമാര്, െഡപ്യൂട്ടി മേയര് കെ.ആര്. പ്രേംകുമാര് തുടങ്ങിയവര് സംസാരിച്ചു.