കൊച്ചി : മുന്‍മന്ത്രി വി.കെ ഇബ്രാഹിം കുഞ്ഞ് പത്തു കോടി രൂപയുടെ കള്ളപ്പണം വെളുപ്പിച്ചെന്നാരോപിച്ച പരാതിയില്‍ അന്വേഷണം നടത്താന്‍ ഹൈക്കോടതി ഉത്തരവിട്ടതിനെതിരെ അദ്ദേഹം നല്‍കിയ ഹര്‍ജി ഹൈക്കോടതി പരിഗണിക്കും. ഈ ഹര്‍ജി പരിഗണിക്കുന്നത് ചീഫ് ജസ്റ്റീസ് എസ്.മണികുമാര്‍, ജസ്റ്റീസ് ഷാജി പി ചാലി എന്നിവരുള്‍പ്പെട്ട ഡിവിഷന്‍ ബെഞ്ചാണ്.
കളമശേരി സ്വദേശിയായ ഗിരീഷ് ബാബു ആണ് നോട്ടുനിരോധന സമയത്ത് ചന്ദ്രിക ദിനപത്രത്തിന്‍റെ അക്കൗണ്ടിലൂടെ 10 കോടി രൂപയുടെ കള്ളപ്പണം വെളുപ്പിച്ചെന്നാരോപിച്ച്‌ ഇബ്രാഹിം കുഞ്ഞിനെതിരെ അന്വേഷണം ആവശ്യപ്പെട്ടത്. എന്നാല്‍ ഈ പരാതിയില്‍ സിംഗിള്‍ ബെഞ്ച് വിധി പറഞ്ഞത് തന്‍റെ വാദം കേള്‍ക്കാതെയാണു എന്ന് ചൂണ്ടിക്കാട്ടിയാണ് ഇബ്രാഹിംകുഞ്ഞ് അപ്പീല്‍ നല്‍കിയത്.
