തിരുവനന്തപുരം: പുരാവസ്തു തട്ടിപ്പ് കേസില്‍ ഐ ജി ലക്ഷ്മണിനെ സസ്പെന്ഡ് ചെയ്തു. പുരാവസ്തു തട്ടിപ്പ് കേസില്‍ പ്രതിയായ സാഹചര്യത്തിലാണ് സര്‍ക്കാര്‍ നടപടി. സംസ്ഥാന പോലീസ് മേധാവിയുടെ ശുപാര്‍ശ പ്രകാരമാണ് നടപടി. ലക്ഷ്മണ്‍ കൃത്യവിലോപം നടത്തിയെന്ന് കണ്ടെത്തി. കര്‍ശന നടപടി വേണമെന്നും ഡി.ജി.പി ശുപാര്‍ശ ചെയ്തു. ആന്ധ്ര സ്വദേശികളുമായുള്ള മോന്‍സണ്‍ മാവുങ്കലിന്റെ സാമ്പത്തിക ഇടപാടുമായി ഐജി ലക്ഷ്മണനും ബന്ധമുണ്ടെന്നാണ് ഇഡി അന്വേഷിക്കുന്നത്.
ആന്ധ്രാ സ്വദേശിനിയായ ഇടനിലക്കാരി വഴി മോന്‍സന്റെ പുരാവസ്തുക്കള്‍ ലക്ഷ്മണ്‍ വില്പന നടത്താന്‍ ശ്രമിച്ചതിന്റെയും വിവരങ്ങള്‍ പുറത്തു വന്നിരുന്നു. നേരത്തെ ഐ.ജി ലക്ഷ്മണയുടെ സസ്പെന്‍ഷന്‍ മൂന്ന് മാസത്തേക്ക് നീട്ടിയിരുന്നു. പുരാവസ്തു തട്ടിപ്പ് കേസിലെ പ്രതി മോന്‍സന്‍ മാവുങ്കലുമായുള്ള ബന്ധത്തെ തുടര്‍ന്നായിരുന്നു ഐ.ജി ലക്ഷ്മണയെ സസ്പെന്ഡ് ചെയ്തത്. സസ്പെന്‍ഷന്‍ നീട്ടാന്‍ റിവ്യൂ കമ്മിറ്റി ശുപാര്‍ശ ചെയ്തിരുന്നു. ചീഫ് സെക്രട്ടറി അധ്യക്ഷനായ ഉന്നതാധികാര സമിതി യോഗം ചേര്‍ന്നാണ് സസ്പെന്‍ഷന്‍ കാലാവധി നീട്ടാന്‍ നേരത്തെ തീരുമാനിച്ചത്. ശുപാര്‍ശ മുഖ്യമന്ത്രി അംഗീകരിച്ച് ഉത്തരവിറക്കുകയായിരുന്നു.
