ഇടുക്കി : നെടുങ്കണ്ടത്ത് കുഴൽ കിണർ ജോലിക്കിടെ തോട്ട പൊട്ടി ഗുരുതര പരുക്കേറ്റ ചികിത്സയിലിരുന്ന മധ്യവയസ്കൻ മരിച്ചു. കമ്പംമെട്ട് അച്ചക്കട പുലിയെള്ളുംപുറം രാജേന്ദ്രൻ (56) ആണ് മരണത്തിന് കീഴടങ്ങിയത്. കൂടെയുണ്ടായിരുന്ന അണക്കര സുൽത്താൻകട തച്ചിലേത്ത് ജയ്മോൻ (45) പാല മാസ്ലീവാ മെഡിസിറ്റിയിൽ ചികിത്സയിൽ കഴിയുകയാണ്.
ഇന്നലെ വൈകുന്നേരം 7 മണിയോടെയാണ് സംഭവം നടന്നത്. രാജേന്ദ്രന്റെ കൈകൾ അറ്റുപോയിരുന്നു. കാലിനും ഗുരുതര പരുക്കേറ്റിരുന്നു. പരുക്കേറ്റ ഇരുവരെയും പാലായിലെ സ്വകാര്യ ആശുപത്രിയിലേക്ക് എത്തിച്ചു. കുഴൽ കിണർ ജോലിയ്ക്കായി എത്തിയതായിരുന്നു രാജേന്ദ്രനും ജയ്മോനും. വെള്ളം കുറവായതിനെ തുടർന്ന്, തോട്ട കുഴൽ കിണറിലേക്ക് പൊട്ടിച്ച് ഇടുകയായിരുന്നു. ഇതിനിടെയായിരുന്നു അപകടം നടന്നത്. സംഭവത്തിൽ പോലീസ് കേസെടുത്തിട്ടുണ്ട്.
