തിരുവനന്തപുരം: നടുറോഡിൽ വീണ്ടും സ്ത്രീക്കെതിരെ ലൈംഗികാതിക്രമം. വഞ്ചിയൂർ മൂലവിളാകം ജംഗ്ഷനിൽ വച്ചാണ് 49 കാരിയെ അജ്ഞാതൻ ആക്രമിച്ചത്. മരുന്ന് വാങ്ങാൻ പുറത്തുപോയി മടങ്ങവേ വീട്ടിലേക്കുള്ള വഴിയിൽ തടഞ്ഞുനിർത്തി അതിക്രൂരമായി ആക്രമിക്കുകയായിരുന്നു. കഴിഞ്ഞ തിങ്കളാഴ്ച രാത്രി 11മണിക്കാണ് സംഭവം. മകൾക്കൊപ്പമാണ് പരാതിക്കാരി താമസിക്കുന്നത്. ആക്രമണം നടന്ന് നിമിഷങ്ങൾക്കകം അറിയിച്ചിട്ടും പേട്ട പോലീസ് അനങ്ങിയില്ലെന്ന് പരാതിക്കാരി ആരോപിച്ചു.
വീട്ടിലെത്തി മകളോട് വിവരം അറിയിച്ചതോടെ മകൾ പേട്ട പോലീസ് സ്റ്റേഷനിൽ വിളിച്ച് പരാതി പറഞ്ഞെങ്കിലും മേൽവിലാസം ചോദിച്ചതല്ലാതെ പോലീസ് മറ്റ് സഹായമൊന്നും നൽകിയില്ല. ഇതോടെ പരാതിക്കാരി മകൾക്കൊപ്പം സ്വകാര്യ ആശുപത്രിയിൽ ചികിത്സ തേടി. മൂന്ന് ദിവസത്തിന് ശേഷം പരാതിക്കാരി കമ്മീഷണർക്ക് പരാതി നൽകിയതിന് പിന്നാലെയാണ് പോലീസ് കേസെടുത്തത്. അന്വേഷണം തുടരുകയാണെന്നാണ് പോലീസ് പറയുന്നത്.
