ദില്ലി : ബോളിവുഡ് നടനും ജനസേവന പ്രവര്‍ത്തനങ്ങളിലൂടെ ശ്രദ്ധേയനുമായ സോനു സൂദിന്റെ മുംബൈ ഓഫിസില്‍ ആദായ നികുതി വകുപ്പ് റെയ്ഡ് നടത്തി. സോനുവിന്റെ ഉടമസ്ഥതയിലുള്ള ആറ് സ്ഥലങ്ങളിലാണ് റെയ്ഡ് നടത്തിയത്. റെയ്ഡ് സംബന്ധിച്ച്‌ കൂടുതല്‍ വിവരങ്ങള്‍ പുറത്ത് വന്നിട്ടില്ല.
“സോനു സൂദിന്റെ കമ്ബനിയും ലക്നൗ ആസ്ഥാനമായുള്ള റിയല്‍ എസ്റ്റേറ്റ് സ്ഥാപനവും തമ്മില്‍ അടുത്തിടെയുള്ള ഒരു ഇടപാട് നടത്തിയിരുന്നു ഇതും ആദായനികുതി വകുപ്പിന്റെ നിരീക്ഷണത്തിലാണ്. ഈ ഇടപാടില്‍ നികുതി വെട്ടിപ്പ് നടത്തിയെന്നാരോപിച്ചാണ് ആദായ നികുതി വകുപ്പ് റെയ്ഡ് നടത്തിയതെന്നാണ് ഐടി വൃത്തങ്ങള്‍ ചൂണ്ടിക്കാണിക്കുന്നത്.
ദില്ലിയിലെ ആം ആദ്മി സര്‍ക്കാരിന്റെ വിദ്യാര്‍ത്ഥികള്‍ക്കായുള്ള ഒരു പ്രൊജക്ടിന്റെ ബ്രാന്‍ഡ് അംബാസഡറായി സോനു സൂദിനെ തിരഞ്ഞെടുത്തിരുന്നു. ഇതുമായി ബന്ധപ്പെട്ട് ദില്ലി മുഖ്യമന്ത്രി അരവിന്ദ് കെജ്രിവാളുമായി നടന്‍ കൂടിക്കാഴ്ച നടത്തി ദിവസങ്ങള്‍ക്ക് ശേഷമാണ് ആദായ നികുതി വകുപ്പിന്റെ റെയ്ഡുകള്‍ വരുന്നത്.
