ന്യൂഡല്ഹി : രാജ്യത്ത് പ്രതിദിന കോവിഡ് രോഗികളുടെ എണ്ണം രണ്ടര ലക്ഷം കടന്നു. 24 മണിക്കൂറിനിടെ 2,64,202 പേര്ക്ക് കോവിഡ് സ്ഥിരീകരിച്ചു. രാജ്യത്ത് നിലവില് ചികിത്സയിലുള്ളവരുടെ എണ്ണം 12.7 ലക്ഷമാണ്. ടെസ്റ്റ് പോസിറ്റിവിറ്റി നിരക്ക് 14.7%. രോഗമുക്തി നിരക്ക് 95.20%. കോവിഡ് കേസുകളുടെ എണ്ണത്തില് കഴിഞ്ഞ ദിവസത്തേക്കാള് 4.83 ശതമാനം വര്ധനവുണ്ടായിട്ടുണ്ട്. ഏറ്റവും കൂടുതല് പേര്ക്ക് കോവിഡ് സ്ഥിരീകരിച്ചത് മഹാരാഷ്ട്രയിലാണ്. ഒരു ദിവസത്തിനിടെ നാല്പത്തി ആറായിരത്തില് അധികം പേര്ക്കാണ് സംസ്ഥാനത്ത് രോഗം സ്ഥിരീകരിച്ചത്. ഡല്ഹിയിലെ കേസുകളില് റെക്കോഡ് പ്രതിദിന വര്ധനയാണ് ഉണ്ടായത്. ഇന്നലെ കോവിഡ് സ്ഥിരീകരിച്ചത് 28000ല് അധികം പേര്ക്കാണ്. പോസിറ്റിവിറ്റി നിരക്ക് 28 ശതമാനത്തില് എത്തി. പശ്ചിമ ബംഗാളില് പോസിറ്റിവിറ്റി നിരക്ക് വീണ്ടും ഉയര്ന്ന് 32.13 ശതമാനമായി.
24 മണിക്കൂറിനിടെ രാജ്യത്ത് കോവിഡ് ബാധിച്ച് 315 മരണങ്ങളും രേഖപ്പെടുത്തിയതായി കേന്ദ്ര ആരോഗ്യ മന്ത്രാലയം അറിയിച്ചു. ഇതോടെ രാജ്യത്ത് ഇതുവരെയുള്ള കോവിഡ് ബാധിത മരണങ്ങള് 4,85,350 ആയിട്ടുണ്ട്.
ഉത്തര്പ്രദേശ്, ബിഹാര്, ഹരിയാന തുടങ്ങിയ സംസ്ഥാനങ്ങളിലും കോവിഡ് കേസുകള് കൂടി. ഇതിനിടെ കോവാക്സിന് പൂര്ണ്ണ വാണിജ്യ അനുമതി തേടി ഭാരത് ബയോട്ടെക് ഡിസിജിഐയെ സമീപിച്ചു. നിലവില് അടിയന്തര ഉപയോഗ അനുമതി മാത്രമാണ് ഉള്ളത്. കോവിഡ് കേസുകള് ഉയരുമ്പോഴും ദേശീയ ലോക്ക്ഡൗണ് ഉണ്ടാവില്ലെന്ന സന്ദേശമാണ് പ്രധാനമന്ത്രി നരേന്ദ്രമോദി ഇന്നലെ നല്കിയത്. കോവിഡിനെ തുടര്ന്നുള്ള നിയന്ത്രണങ്ങള് ജനജീവിതത്തെ ബാധിക്കില്ലെന്ന് ഉറപ്പു വരുത്തണമെന്നായിരുന്നു പ്രധാനമന്ത്രിയുടെ നിര്ദേശം.
