ന്യൂഡൽഹി : കേരളമുൾപ്പെടെ അഞ്ച് സംസ്ഥാനങ്ങളിൽ നടന്ന തെരഞ്ഞെടുപ്പുകളിൽ കോവിഡ് മാനദണ്ഡങ്ങൾ പാലിക്കുന്നതിൽ പാളിച്ചയുണ്ടായോ എന്നതുൾപ്പെടെ പരിശോധിക്കാൻ തെരഞ്ഞെടുപ്പു കമ്മീഷൻ കോർ കമ്മിറ്റിയെ നിയോഗിച്ചു. കമ്മീഷൻ സെക്രട്ടറി ജനറൽ ഉമേഷ് സിൻഹ അധ്യക്ഷനായ സമിതി തെരഞ്ഞെടുപ്പ് ചട്ടങ്ങളിലെ പഴുതുകളും തെരഞ്ഞെടുപ്പു ചെലവു നിയന്ത്രിക്കുന്നതും ഉൾപ്പെടെ 9 വിഷയങ്ങൾ പഠിച്ചു റിപ്പോർട്ട് നൽകും.
തെരഞ്ഞെടുപ്പുകളിൽ കോവിഡ് ചട്ടങ്ങൾ പാലിക്കുന്നതിൽ പാളിച്ചയുണ്ടായതായി ആക്ഷേപമുയർന്നിരുന്നു. 5 സംസ്ഥാനങ്ങളിലെ മുഖ്യ തെരഞ്ഞെടുപ്പു കമ്മിഷണർമാരും ഡപ്യൂട്ടി കമ്മീഷണർമാരും തെരഞ്ഞെടുക്കപ്പെട്ട നിരീക്ഷകരും കോർ കമ്മിറ്റിയിലുണ്ടാകും. ഒരു മാസത്തിനകം റിപ്പോർട്ട് നൽകും.
