ജയ്പൂർ: രാജസ്ഥാനിൽ പുതുതായി ഉദ്ഘാടനം ചെയ്ത എക്സ്പ്രസ്വേ പിക്നിക് സ്ഥലമാക്കി മാറ്റിയ കുടുംബത്തിനുനേരെ വിമർശനം. കുടുംബം റോഡിലിരുന്ന് ഭക്ഷണം കഴിക്കുന്നതിന്റെ വീഡിയോ വൈറലായി. പാർക്കിൽ ഇരിക്കുന്നപോലെയാണ് കുടുംബം റോഡിൽ ഇരിക്കുന്നത്. പത്രങ്ങളും ടാർപോളിനും റോഡിൽ വിരിച്ചിട്ട് അതിലിരുന്ന് ഇവർ ഭക്ഷണം കഴിക്കുന്നതാണ് വീഡിയോയിലുള്ളത്. ‘ശിവ് മഹേശ്വരി’ എന്ന ഇൻസ്റ്റാഗ്രാം ഉപഭോക്താവ് പങ്കുവച്ച വീഡിയോയാണ് ചർച്ചയാവുന്നത്. പ്ളേറ്റുകളിൽ ഭക്ഷണം വിളമ്പുന്നതും കാണാം. വീഡിയോ വൈറലായതിന് പിന്നാലെ പൊതുസ്ഥലങ്ങളെ സ്വകാര്യ പിക്നിക് സ്പോട്ടുകളാക്കി മാറ്റിയതിനെതിരെ സമൂഹമാദ്ധ്യമ ഉപഭോക്താക്കൾ രംഗത്തെത്തുകയായിരുന്നു.
അടിസ്ഥാന പൗരബോധത്തെയും പൊതു സ്വത്തിനെയും അവഗണിക്കുന്ന പെരുമാറ്റത്തിൽ ആളുകൾ അഭിമാനിക്കുന്നതിന്റെ ഉദാഹരണമാണിതെന്ന് പലരും വിമർശിച്ചു. പൊതു ഇടങ്ങളിൽ മാലിന്യം തള്ളുന്നത് സംബന്ധിച്ചും ചിലർ ആശങ്കകൾ ഉന്നയിച്ചു. പൊതു അടിസ്ഥാന സൗകര്യങ്ങളെ പലപ്പോഴും സ്വകാര്യ ഇടത്തിന്റെ ഒരു ഭാഗമായി കണക്കാക്കുന്നത് എന്തുകൊണ്ടാണെന്ന് പല ഉപയോക്താക്കളും ചോദ്യം ചെയ്തതോടെ ഇന്റർനെറ്റിൽ നിന്നുണ്ടായ പ്രതികരണം വലിയൊരളവോളം വിമർശനാത്മകമായിരുന്നു.
