ന്യൂഡല്ഹി: കൊറോണ വൈറസ് ബാധ വ്യാപിക്കുന്ന സാഹചര്യത്തില് ഇറാനില് കുടുങ്ങിയ 58 ഇന്ത്യക്കാരെ ഗാസിയാബാദില് എത്തിച്ചു. ടെഹ്റാനില് നിന്നുള്ള തീര്ത്ഥാടകരെയാണ് വ്യോമസേനാ വിമാനത്തില് ഇന്ന് തിരിച്ചെത്തിച്ചത്. വ്യോമസേനയുടെ സി-17 ഗ്ലോബ്മാസ്റ്റര് വിമാനത്തിലാണ് ആദ്യ സംഘത്തെ ഗാസിയാബാദിലെ ഹിന്ഡന് വ്യോമതാവളത്തില് കൊണ്ടുവന്നത്. കോവിഡ് 19 ബാധയില്ലാത്തവരെയാണ് ആദ്യഘട്ടത്തില് ഇന്ത്യയിലെത്തിച്ചിരിക്കുന്നത്. ഇവരെ ആരോഗ്യ പരിശോധനകള്ക്ക് ശേഷമാകും പുറത്തേക്ക് വിടുക.
തിങ്കളാഴ്ച രാത്രി എട്ടിനാണ് സി-17 വിമാനം ടെഹ്റാനിലേക്ക് പുറപ്പെട്ടത്. ഇന്ത്യക്കാരെ നാട്ടിലെത്തിക്കുന്നതിന് മുന്നോടിയായി ഇവര്ക്ക് കൊറോണ വൈറസ് ബാധയുണ്ടോയെന്ന് പരിശോധിക്കുന്നതിനായി ഡോക്ടര്മാരുടെ സംഘം കഴിഞ്ഞ ആഴ്ച ഇറാനിലെത്തിയിരുന്നു. പൂണെയിലെ നാഷനല് വൈറോളജി ഇന്സ്റ്റിറ്റ്യൂട്ട്, ഇന്ത്യന് മെഡിക്കല് റിസര്ച്ച് കൗണ്സില് എന്നിവയില് നിന്നുള്ള അഞ്ച് ഡോക്ടര്മാര് അടങ്ങുന്ന സംഘം മാര്ച്ച് നാലിനാണ് ഇറാനിലേക്ക് തിരിച്ചത്.
തുടര്ന്ന് വിദഗ്ധ സംഘം108 പേരുടെ സ്രവം ഇന്ത്യയിലെത്തിച്ച് പരിശോധിക്കുകയും കോവിഡ് 19 രോഗമില്ലെന്ന് സ്ഥിരീകരിക്കുകയും ചെയ്തിരുന്നു. 1200 ഓളം ഇന്ത്യക്കാരാണ് ഇറാനിലുള്ളത്. ഇതില് കൂടുതലും വിദ്യാര്ഥികളും തീര്ത്ഥാടകരുമാണ്. തെഹ്റാനിലും ഖ്വാമിലും കുടുങ്ങികിടക്കുന്നവര് ഇന്ത്യയിലേക്ക് തിരിച്ചെത്തിക്കണമെന്ന് ആവശ്യപ്പെട്ടിരുന്നു.
