കൊല്ലം : ഓണ്‍ലൈന്‍ പഠനത്തില്‍ നുഴഞ്ഞു കയറ്റക്കാര്‍ അദ്ധ്യാപകര്‍ക്കും, വിദ്യാര്‍ത്ഥികള്‍ക്കും, തലവേദനയാകുന്നു. വിദ്യാർത്ഥികൾക്ക് ആയി തയ്യാറാക്കുന്ന വാട്സ്ആപ്പ് ഗ്രൂപ്പുകളിലും, ഗൂഗിൾ മീറ്റ് തുടങ്ങിയവയിലുമാണ് കുട്ടികൾ അല്ലാത്തവർ നുഴഞ്ഞു കയറി ക്ലാസ്സുകൾക്ക് തടസം സൃഷ്ടിക്കുന്നത്. പല വിദ്യാലയങ്ങളിലും ഇത്തരത്തിലുള്ള സംഭവങ്ങൾ ഉണ്ടായിട്ടുണ്ടെങ്കിലും, അതിൽ ചുരുക്കം ചിലർ മാത്രമാണ് പോലീസിൽ പരാതി നൽകിയത്.
കോവിഡ് കാലത്ത് ക്ലാസ്മുറികള്‍ ഒരു സ്‌ക്രീനിലേക്ക് ചുരുങ്ങിയതോടെ ഒട്ടേറെ ബുദ്ധിമുട്ടുകളാണ് അദ്ധ്യാപകരും വിദ്യാര്‍ഥികളും സ്‌കൂള്‍ മാനേജ്‌മെന്റുകളും നേരിടുന്നത്. വിദ്യാര്‍ത്ഥികളില്‍ നിന്നും ലിങ്ക് കൈവശപ്പെടുത്തി ഓണ്‍ലൈന്‍ ക്ലാസുകളില്‍ നുഴഞ്ഞുകയറി സാമൂഹികദ്രോഹികളുണ്ടാക്കുന്ന ശല്യം അദ്ധ്യാപികമാരെയാണ് കൂടുതലും ബാധിക്കുന്നത്. നേരംപോക്കായി കരുതിയാണ് സാമൂഹിക വിരുദ്ധരില്‍ പലരും ഓണ്‍ലൈന്‍ ക്ലാസുകളിലേക്ക് നുഴഞ്ഞുകയറി ശല്യമുണ്ടാക്കുന്നത്.
