തിരുവനന്തപുരം : തിരുവനന്തപുരത്തെ ഹോട്ടലുകളിൽ വ്യാപക പരിശോധന. സ്റ്റാർ ഹോട്ടലുകളടക്കം നൂറിലധികം സ്ഥാപനങ്ങളിലാണ് പരിശോധന നടക്കുന്നത്. എല്ലായിടത്തും ഒരേ സമയത്ത് 14 സ്ക്വാഡുകളുടെ നേതൃത്വത്തിലാണ് പരിശോധന പുരോഗമിക്കുന്നത്. ഹോട്ടലുകളിലെ ഭക്ഷണങ്ങളിലെ വ്യത്തിഹീനമായ സാഹചര്യത്തെ കുറിച്ച് കോർപ്പറേഷനുകളിൽ പരാതികൾ ലഭിച്ചിരുന്നു. ഈ സാഹചര്യത്തിലാണ് തിരുവനന്തപുരം കോർപറേഷൻ ആരോഗ്യ വിഭാഗത്തിന്റെ നേതൃത്വത്തിലുള്ള പരിശോധന നടക്കുന്നത്.
പരാതിയുടെ അടിസ്ഥാനത്തിൽ കഴിഞ്ഞ ആഴ്ചയും തലസ്ഥാനത്തെ ഹോട്ടലുകൾ കേന്ദ്രീകരിച്ച് മിന്നൽ പരിശോധനകളും നടത്തിയിരുന്നു. പിന്നാലെ ചേർന്ന യോഗത്തിലാണ് വ്യാപക പരിശോധന നടത്താൻ തീരുമാനിച്ചത്. ഇന്ന് വൈകുന്നേരം വരെ പരിശോധനകൾ ഉണ്ടാകും. ഏതെങ്കിലും ഹോട്ടലുകൾ വീഴ്ച വരുത്തിയാൽ ആ സ്ഥാപനങ്ങൾക്കെതിരെ നടപടി എടുക്കുകയും വിശദാംശങ്ങൾ കോർപറേഷൻ ആരോഗ്യ വിഭാഗം പുറത്തുവിടുകയും ചെയ്യും.
