വടകര : മിനി സിവില്‍ സ്റ്റേഷനില്‍ പ്രവര്‍ത്തിക്കുന്ന മോട്ടോര്‍ വാഹന വകുപ്പിന്റെ ഓഫിസിലെ ജനലുകള്‍ തുറന്നിട്ട് ജീവനക്കാര്‍ ഓഫിസ് പൂട്ടി സ്ഥലം വിട്ടു. ശനിയാഴ്ചയാണ് ഓഫിസിലെ ജനലുകളുടെ വാതിലുകള്‍ അടക്കാതെ ജീവനക്കാര്‍ ഓഫിസ് പൂട്ടി സ്ഥലം കലിയാക്കിയത്. ഞായറാഴ്ച ഓഫിസ് പ്രവൃത്തി ദിവസമായിരുന്നില്ല. മാര്‍ക്കറ്റ് റോഡില്‍ നിന്നും നോക്കിയാല്‍ കാണുന്ന നിലയിലാണ് ഓഫിസ് പ്രവര്‍ത്തിക്കുന്നത്. ഓഫിസിന്റെ ഒരു ജനല്‍പോലും അടച്ചിരുന്നില്ല.
ഞായറാഴ്ച പരിസര പ്രദേശത്തെ ജനങ്ങളാണ് ജനലുകള്‍ തുറന്നിട്ട നിലയില്‍ കാണുന്നത്. രാത്രികാല പരിശോധനകളും മറ്റും ഉണ്ടെന്നും ആരെങ്കിലും ഓഫിസില്‍ ഉണ്ടാകുമെന്നുമാണ് ജനങ്ങള്‍ ആദ്യം കരുതിയത്. എന്നാല്‍, കെട്ടിടത്തിനുള്ളില്‍ കയറി നോക്കിയപ്പോഴാണ് പുറമെ നിന്നും ഓഫിസ് പൂട്ടിയ നിലയില്‍ കാണുന്നത്. മാസങ്ങള്‍ക്ക് മുമ്പ് തൊട്ടടുത്ത താലൂക്ക് ഓഫിസ് കെട്ടിടം തീ വെച്ച്‌ നശിപ്പിച്ചിരുന്നു.
