ശ്രീനഗര്‍: ജമ്മുകാഷ്മീരില്‍ വീണ്ടും ഭീകരരും സൈന്യവും തമ്മില്‍ ഏറ്റുമുട്ടല്‍. അവന്തിപ്പോറ മേഖലയിലാണ് ഭീകരരും സൈന്യവും തമ്മില്‍ ഏറ്റുമുട്ടല്‍ നടക്കുന്നത്. കഴിഞ്ഞ ദിവസങ്ങളിലും ഇവിടെ ഏറ്റുമുട്ടല്‍ നടന്നിരുന്നു. കൂടുതല്‍ ഭീകരര്‍ മേഖലയില്‍ ഒളിച്ചിരിക്കുന്നുവെന്ന വിവരത്തിന്റെ അടിസ്ഥാനത്തില്‍ സൈന്യം നടത്തിയ തെരച്ചിലിനിടെ ഭീകരര്‍ വെടിയുതിര്‍ക്കുകയായിരുന്നു. സൈന്യം ശക്തമായി തിരിച്ചടിച്ചു.
രാവിലെ തെക്കന്‍ കാഷ്മീരിലെ ത്രാല്‍ മേഖലയില്‍ ഭീകരരുമായി നടന്ന ഏറ്റുമുട്ടലില്‍ സൈനികന് പരിക്കേറ്റിരുന്നു. മേഖലയില്‍ ഭീകരരുടെ സാന്നിധ്യം മനസിലാക്കിയാണ് സൈന്യവും ജമ്മു കാഷ്മീര്‍ പോലീസും സ്ഥലത്തെത്തിയത്. തുടര്‍ന്നാണ് ഏറ്റുമുട്ടലുണ്ടായത്. ബുധനാഴ്ച ത്രാല്‍ മേഖലയില്‍ സൈന്യത്തിന്റെ വെടിയേറ്റ് ജയ്ഷെ മുഹമ്മദ് ഭീകരന്‍ കൊല്ലപ്പെട്ടിരുന്നു. ഇവിടെ നിന്നും മറ്റൊരു ഭീകരന്‍ രക്ഷപെടുകയും ചെയ്തിരുന്നു.
