കോട്ടയം : ‘രണ്ടില’ കിട്ടില്ലെന്നുറപ്പായതിനൊപ്പം കൈയിലിരുന്ന ‘ചെണ്ട’യും പൊട്ടിയതോടെ പുതിയ ചിഹ്നത്തിന് തലപുകഞ്ഞ് ജോസഫ് വിഭാഗം. രണ്ടില ചിഹ്നം ജോസ് കെ. മാണി വിഭാഗത്തിന് അനുവദിച്ച നടപടി ചോദ്യം ചെയ്ത് ജോസഫ് വിഭാഗം സമര്‍പ്പിച്ച ഹര്‍ജി സുപ്രീംകോടതി തള്ളിയതിനൊപ്പമാണ് പുതിയ പ്രതിസന്ധി.
രണ്ടില ഇല്ലെങ്കില്‍ തദ്ദേശ തെരഞ്ഞെടുപ്പില്‍ മത്സരിച്ച ചെണ്ട ചിഹ്നത്തില്‍ നിയമസഭയിലേക്ക് മത്സരിക്കാനായിരുന്നു പാര്‍ട്ടി നേതൃത്വത്തിലെ ധാരണ. എന്നാല്‍ നിയമസഭ തെരഞ്ഞെടുപ്പിന് തെരഞ്ഞെടുപ്പ് കമ്മീഷന്‍ അനുവദിച്ച ചിഹ്നങ്ങളില്‍ ചെണ്ടയില്ല.
ട്രാക്ടര്‍ ഓടിക്കുന്ന കര്‍ഷകന്‍ ഉള്‍പ്പെടെ മൂന്ന് ചിഹ്നങ്ങളാണ് പുതുതായി പരിഗണിക്കുന്നത്. കേരള കോണ്‍ഗ്രസ്-എമ്മില്‍ ലയിക്കുന്നതിനുമുമ്പ് സൈക്കിള്‍ ചിഹ്നത്തിലാണ് കേരള കോണ്‍ഗ്രസ് (ജെ) സ്ഥാനാര്‍ഥികള്‍ മത്സരിച്ചിരുന്നത്. ലയനത്തിനുപിന്നാലെ കമ്മീഷന്‍ മരവിപ്പിച്ച ഈ ചിഹ്നം തിരികെ ലഭിക്കാനുള്ള സാധ്യതകളും പരിശോധിക്കുന്നുണ്ട്.
അതിനിടെ ജോസഫ് വിഭാഗം സ്ഥാനാര്‍ഥികള്‍ക്കെല്ലാം പൊതുചിഹ്നം നല്‍കണമെന്നാവശ്യപ്പെട്ട് പി.ജെ. ജോസഫ് തെരഞ്ഞെടുപ്പ് കമീഷന് കത്ത് നല്‍കിയി. എല്ലാ സ്ഥാനാര്‍ഥിക്കും ഒരേ ചിഹ്നം ലഭിക്കുമെന്നാണ് കരുതുന്നതെന്നും അടുത്ത ദിവസം ഇക്കാര്യത്തില്‍ വ്യക്തതയാകുമെന്നും കേരള കോണ്‍ഗ്രസ് (ജോസഫ്) ജനറല്‍ സെക്രട്ടറി ജോയി എബ്രഹാം പറഞ്ഞു.
അതിനിടെ ഹര്‍ജി സുപ്രീംകോടതി തള്ളിയതോടെ ജോസഫ് വിഭാഗം സ്ഥാനാര്‍ഥികളെല്ലാം സ്വതന്ത്രരെന്ന നിലയിലാകും മത്സരിക്കേണ്ടിവരുക. ‘രണ്ടില’യില്‍ വീണ്ടും തിരിച്ചടി നേരിട്ടതോടെ ഇനി നിയമപോരാട്ടം വേണ്ടെന്ന അഭിപ്രായവും പാര്‍ട്ടിയില്‍ ശക്തമാണ്. പുതിയ പാര്‍ട്ടി രജിസ്റ്റര്‍ ചെയ്യണമെന്ന വികാരമാണ് ഇവര്‍ പങ്കുവെക്കുന്നത്.
പഴയ ജോസഫ് ഗ്രൂപ്പ് പുനഃസ്ഥാപിക്കാന്‍ ആലോചനയുണ്ടെങ്കിലും പിളര്‍പ്പില്‍ മാണി വിഭാഗക്കാരും ഒപ്പമെത്തിയതിനാല്‍ മറ്റുപേരുകളാണ് പരിഗണിക്കുന്നത്. എല്‍.ഡി.എഫിലെ മികച്ച പരിഗണനക്കുപിന്നാലെ ‘രണ്ടില’യും ലഭിച്ചതോടെ കേരള കോണ്‍ഗ്രസ്-എം കേന്ദ്രങ്ങള്‍ ആഹ്ലാദത്തിലാണ്. മുന്നണി മാറി മത്സരിക്കുന്നതിനാല്‍ രണ്ടില അനിവാര്യമായിരുന്നെന്നും ഇവര്‍ ചൂണ്ടിക്കാട്ടുന്നു.
