കണ്ണൂര് : മാടായിപ്പാറയില് കെ – റെയില് സില്വര്ലൈന് പദ്ധതിക്കായി സ്ഥാപിച്ച സര്വേക്കല്ല് പിഴുതുമാറ്റിയതായി കണ്ടെത്തി. ചൊവ്വാഴ്ച രാത്രി പാറക്കുളത്തിന് സമീപത്താണ് സില്വര് ലൈന് സര്വേയുടെ ഭാഗമായി സ്ഥാപിച്ച കല്ല് പിഴുതുമാറ്റിയത് കണ്ടെത്തിയത്. പഴയങ്ങാടി പോലീസ് അന്വേഷണം ആരംഭിച്ചു. പദ്ധതിക്കായി സ്ഥാപിച്ച സര്വേക്കുറ്റികള് ജനങ്ങളുടെ പിന്തുണയോടെ പിഴുതെറിയുമെന്ന് കെ.പി.സി.സി അദ്ധ്യക്ഷന് കെ.സുധാകരന് പ്രഖ്യാപിച്ചതിന് പിന്നാലെയാണ് സംഭവം ശ്രദ്ധയില്പെട്ടത്. സില്വര് ലൈന് പദ്ധതിയെ സര്വശക്തിയുമുപയോഗിച്ച് എതിര്ക്കാനാണ് കെ.പി.സി.സി രാഷ്ട്രീയകാര്യസമിതി യോഗം ഇന്നലെ ഐക്യകണ്ഠേന തീരുമാനിച്ചത്. പദ്ധതിക്കുള്ള രണ്ടു ലക്ഷം കോടിയില് നിന്നുള്ള അഞ്ച് ശതമാനം കമ്മീഷനിലാണ് പിണറായിയുടെ കണ്ണെന്ന് സുധാകരന് വിമര്ശിച്ചിരുന്നു. മുഖ്യമന്ത്രിയുടെ വിശദീകരണ യോഗങ്ങള്ക്ക് ബദലായി ഗൃഹസന്ദര്ശനം നടത്തും.
പ്രചാരണത്തിന് വളന്റിയര്മാരെ നിയോഗിക്കും. പദ്ധതി കടന്നുപോകുന്ന 12 ഹോട്ട് സ്പോട്ടുകളില് കര്ഷകസമര മാതൃകയില് സമരം സംഘടിപ്പിക്കാനും ധാരണയായി. കാലഹരണപ്പെട്ട സാങ്കേതിക വിദ്യയാണ് ഉപയോഗിക്കുന്നത്. കെ – റെയില് സൃഷ്ടിക്കുന്ന ദുരന്തത്തിന് ഇരയാകുന്നത് റെയില്പാത കടന്നുപോകുന്ന വഴിയിലുള്ളവര് മാത്രമല്ല. ഏറെ വലിയ പ്രദേശത്തെ ആളുകളെ ബാധിക്കും. റോഡ് പാടില്ല, റോഡ് വികസിപ്പിക്കരുത്, റെയില്വേ ട്രാക്ക് വികസിപ്പിക്കരുത്. ഇതൊക്കെ വന്നാല് എന്താണ് കഥ. 10 ജില്ലകളിലൂടെയാണ് പദ്ധതി കടന്നുപോകുന്നത്. അവിടെയൊന്നും റോഡ് നിര്മിക്കാന് പാടില്ലായെന്നായാല് എന്താകും അവസ്ഥ. സില്വര് ലൈനിന് വേണ്ടി മുഖ്യമന്ത്രി വാശിപിടിക്കുന്നത് ലാവലിന് നേട്ടം ഓര്ത്താണ്. എന്നാല് ഒരു കാരണവശാലും ഈ പദ്ധതി നടപ്പാക്കാന് കോണ്ഗ്രസ് അനുവദിക്കില്ല. വീടുകള് കയറി പ്രചാരണം നടത്തും. ലഘുലേഖകള് നല്കി ജനങ്ങളെ ബോധവത്കരിക്കുമെന്നും സുധാകരന് പറഞ്ഞു.
