കൊച്ചി: മഹാരാജാസ് കോളേജ് വ്യാജ തൊഴില് പരിചയ സര്ട്ടിഫിക്കറ്റ് വിവാദത്തില് കുറ്റാരോപിതയായ കെ വിദ്യക്കെതിരെ കൂടുതല് ആരോപണവുമായി കെ.എസ്.യു. കാലടി സര്വകലാശാലയില് അട്ടിമറി നടത്തിയാണ് വിദ്യയുടെ പി.ച്ച്.ഡി പ്രവേശനമെന്ന് കെ.എസ്.യു ആരോപിച്ചു. റിസര്ച്ച് കമ്മിറ്റി തയ്യാറാക്കിയ 10 പേരുടെ പട്ടികയില് വിദ്യയുടെ പേരുണ്ടായിരുന്നില്ല. വിദ്യയ്ക്കായി അഞ്ച് പേരെക്കൂടി അധികമായി ഉള്പ്പെടുത്തി. വിദ്യയുടെ പിഎച്ച്ഡി പ്രവേശനത്തിന് എസ്എഫ്ഐ സംസ്ഥാന സെക്രട്ടറി പി.എം ആര്ഷോയും മന്ത്രി പി. രാജീവും ക്രമവിരുദ്ധമായി ഇടപെട്ടുവെന്നും ഇവര് മുന്കൈയെടുത്താണ് അട്ടിമറി നടത്തിയതെന്നും കെ.എസ്.യു സംസ്ഥാന വൈസ് പ്രസിഡന്റ് പി.മുഹമ്മദ് ഷമ്മാസ് ആരോപിച്ചു.
അതേസമയം വിദ്യ മുന്പും ഈ വ്യാജ സര്ട്ടിഫിക്കറ്റ് ഉപയോഗിച്ചെന്ന് കണ്ടെത്തല്. കാസര്കോട് കരിന്തളം ഗവണ്മെന്റ് കോളേജില് വിദ്യ ജോലി നേടിയതും വ്യാജ സര്ട്ടിഫിക്കറ്റ് ഉപയോഗിച്ചായിരുന്നു. 2022 ജൂണ് മുതല് 2023 മാര്ച്ച് വരെ ഗസ്റ്റ് ലക്ച്ചററായാണ് ജോലി ചെയ്തത്. മഹാരാജാസ് കോളേജിന്റെ പേരിലുള്ള വ്യാജ എക്സ്പീരിയന്സ് സര്ട്ടിഫിക്കറ്റാണ് വിദ്യ ഹാജരാക്കിയതെന്ന് കരിന്തളം ഗവണ്മെന്റ് കോളേജ് പ്രിന്സിപ്പല് ഇന് ചാര്ജ് സ്ഥിരീകരിച്ചു.
