കൊച്ചി: വാഴക്കാല സെന്റ് തോമസ് കോണ്‍വെന്റിലെ അന്തേവാസി ഇടുക്കി സ്വദേശിനി സിസ്റ്റര്‍ ജസീന തോമസ് (45)ന്റെ മൃതദേഹം ദുരൂഹ സാഹചര്യത്തില്‍ കണ്ടെത്തി. കോണ്‍വെന്റിന് സമീപത്തെ പാറമടയിലാണ് മൃതദേഹം കണ്ടെത്തിയത്. ഇന്നലെ ഉച്ചയോടെ ജസീനയെ മഠത്തില്‍ നിന്ന് കാണാതാവുകയായിരുന്നുവെന്നാണ് പറയുന്നത്. തുടര്‍ന്ന് മഠം അധികൃതര്‍ തൃക്കാക്കര പോലിസില്‍ പരാതി നല്‍കി.
തുടര്‍ന്ന് നടത്തിയ അന്വേഷണത്തിലാണ് സിസ്റ്റര്‍ ജസീനയെ മരിച്ച നിലയില്‍ കണ്ടെത്തിയത്. 2011 മുതല്‍ സിസ്റ്ററിന് മാനസിക പ്രശ്നങ്ങള്‍ ഉണ്ടായിരുന്നതായും ഇതിനു ഇവര്‍ ചികിത്സ തേടിയിരുന്നതായും മഠം അധികൃതര്‍ വ്യക്തമാക്കി. മരിച്ച സിസ്റ്റര്‍ ജസീനയുടെ ബന്ധുക്കള്‍ കൊച്ചിയില്‍ എത്തിയിട്ടുണ്ട്. സിസ്റ്റര്‍ ജസീനയുടെ മരണത്തില്‍ ദുരൂഹതയുണ്ടെന്നും വിശദമായ അന്വേഷണം വേണമെന്നും നാട്ടുകാര്‍ പറയുന്നു. സിസ്റ്റര്‍ ജസീനയുടെ മൃതദേഹം ഇന്ന് പോസ്റ്റുമോര്‍ട്ടം ചെയ്യും.
