കണ്ണൂര്: ഭിക്ഷ എടുക്കാന് സമ്മതിക്കാത്തതിലുള്ള വിരോധം കാരണമാണ് തീ വെച്ചതെന്ന് കണ്ണൂര് ട്രെയിന് തീവെപ്പ് കേസുമായി ബന്ധപ്പെട്ട് കസ്റ്റഡിയിലെടുത്ത ബംഗാള് സ്വദേശിയുടെ മൊഴി. ഇയാളുടെ അറസ്റ്റ് ഉടന് ഉണ്ടായേക്കും. സുരക്ഷ ഉദ്യോഗസ്ഥരോടുള്ള വിരോധമാണ് പ്രകോപനം ഉണ്ടാക്കിയതെന്നും പ്രതി വെളിപ്പെടുത്തിയതായാണ് പോലീസില് നിന്നും ലഭിച്ച വിവരം. കസ്റ്റഡിയിലുള്ളയാള് തീവെപ്പിന് തൊട്ട് മുന്പ് ട്രാക്കിന് പരിസരത്ത് ഉണ്ടായിരുന്നതായി സിസിടിവി ദൃശ്യങ്ങളില് നിന്ന് വ്യക്തമായിരുന്നു.
ഇയാളെ കണ്ടതായി ബിപിസിഎല് സുരക്ഷ ജീവനക്കാരനും മൊഴി നല്കിയിട്ടുണ്ട്. അതേസമയം എക്സിക്യൂട്ടീവ് എക്സ്പ്രസിലെ ബോഗിക്ക് തീ വെച്ചത് ഇന്ധനം ഉപയോഗിച്ചാണോയെന്ന് ഫോറന്സിക് പരിശോധനയില് വ്യക്തമായിട്ടില്ല. ഇക്കാര്യം ഉറപ്പിക്കാന് ഇന്നലെ വൈകിട്ട് വീണ്ടും ബോഗിയില് പരിശോധന നടത്തിയിരുന്നു. എലത്തൂരില് ആക്രമണമുണ്ടായ അതേ ട്രെയിനിനാണ് ഇന്നലെ പുലര്ച്ചെ തീപിടിച്ചത്. ആലപ്പുഴ-കണ്ണൂര് എക്സിക്യുട്ടീവ് എക്സ്പ്രസിന്റെ ഒരു ബോഗി പൂര്ണമായും കത്തിനശിച്ചു. പുക ഉയര്ന്ന ഉടനെ ബോഗി വേര്പെടുത്തിയിരുന്നു.
