പനാജി: കര്ണാടക നിയമസഭാ തിരഞ്ഞെടുപ്പ് നടക്കുന്ന മെയ് 10ന് സ്വകാര്യമേഖലയിലടക്കം അവധി നല്കി ഗോവ സര്ക്കാര്. സര്ക്കാര് ശമ്പളത്തോടുകൂടിയ അവധിയാണ് സര്ക്കാര് അനുവദിച്ചത്. സ്വകാര്യ സ്ഥാപനങ്ങള്ക്കും വ്യവസായ തൊഴിലാളികള്ക്കും ഈ തീരുമാനം ബാധകമാകും. അയല് സംസ്ഥാനങ്ങളില് തിരഞ്ഞെടുപ്പ് നടക്കുമ്പോള് അവധി നല്കുന്നത് പതിവാണെന്ന് ഗോവ മുഖ്യമന്ത്രിയുടെ ഓഫീസിലെ മുതിര്ന്ന ഉദ്യോഗസ്ഥന് പറഞ്ഞു. കഴിഞ്ഞ വര്ഷം ഗോവയില് വോട്ടെടുപ്പ് നടന്ന ദിവസം കര്ണാടകയില് അവധി പ്രഖ്യാപിച്ചിരുന്നുവെന്ന് അദ്ദേഹം അവകാശപ്പെട്ടു.
എന്നാല് സര്ക്കാര് തീരുമാനത്തിനെതിരെ പ്രതിപക്ഷവും ചില വ്യവസായ സംഘടനകളും രംഗത്തെത്തി. സര്ക്കാറിന്റെ തീരുമാനം വിഡ്ഢിത്തമാണെന്നും കര്ണാടകയില് തെരഞ്ഞെടുപ്പ് നടക്കുന്നതിന് എന്തിനാണ് ഗോവയില് അവധി നല്കുന്നതെന്നും പ്രതിപക്ഷമായ കോണ്ഗ്രസും ആംആദ്മി പാര്ട്ടിയും പറഞ്ഞു.