ബംഗളുരു: കര്ണാടക നിയമസഭാ തെരഞ്ഞെടുപ്പില് ഇഞ്ചോടിഞ്ച് പോരാട്ടമെന്ന് എക്സിറ്റ് പോള് ഫലം. കര്ണാടകയില് തൂക്കുസഭയായിരിക്കുമെന്നും ഏറ്റവും വലിയ ഒറ്റകക്ഷി കോണ്ഗ്രസ് ആയിരിക്കുമെന്നും ഭൂരിഭാഗം എക്സിറ്റ് പോള് ഫലങ്ങളും പ്രവചിക്കുന്നു. ആകെ 224 സീറ്റുകളിലേക്കാണ് വോട്ടെടുപ്പ് നടക്കുന്നത്. അതില് ഭൂരിപക്ഷത്തിന് 113 സീറ്റുകളാണ് വേണ്ടത്. കര്ണാടക നിയമസഭ തെരഞ്ഞെടുപ്പില് 65.69% പോളിംഗ് ആണ് അഞ്ച് മണി വരെ രേഖപ്പെടുത്തിയത്.
മാട്രിസ് എക്സിറ്റ് പോള് ഫലം അനുസരിച്ച് ബിജെപി 79-94 സീറ്റുകള് നേടുമെന്നും കോണ്ഗ്രസ് 103-118 സീറ്റുകള് നേടുമെന്നും ജെഡി (എസ്) 25-33 സീറ്റുകള് നേടുമെന്നും വ്യക്തമാക്കുന്നു. മറ്റുള്ളവര് 2-5 സീറ്റുകള് വരെ നേടുമെന്നും മാട്രിസ് പ്രവചിക്കുന്നു. പോള്സ്ട്രാറ്റിന്റെ എക്സിറ്റ് പോള് ഫലങ്ങള് അനുസരിച്ച് ബിജെപി 88-98 സീറ്റുകളും കോണ്ഗ്രസ് 99-109 സീറ്റുകളും നേടും, ജെഡി (എസ്) 21-26 സീറ്റുകളും മറ്റുള്ളവര് 4 സീറ്റുകളും നേടുമെന്നാണ് വ്യക്തമാക്കുന്നത്. ടിവി-9 എക്സിറ്റ് പോള് പ്രവചനങ്ങള് അനുസരിച്ച് കര്ണാടകത്തില് കോണ്ഗ്രസും ബിജെപിയും തമ്മില് ഇഞ്ചോടിഞ്ച് മത്സരമാണ് നടക്കുക. ബിജെപി 88 മുതല് 98 വരെ സീറ്റുകള് നേടും. കോണ്ഗ്രസ് 99 മുതല് 109 വരെ സീറ്റുകള് നേടുമെന്നും ടിവി-9 എക്സിറ്റ് പോള് പ്രവചിക്കുന്നു. ജെഡി(എസ്) 21 മുതല് 26 വരെ സീറ്റുകള് നേടുമെന്നും ടിവി9 പറയുന്നു.