കൊല്ലം: കെ.ബി. ഗണേഷ്‌കുമാര്‍ ഇത്തവണ സ്വന്തം തട്ടകം വിട്ട് മത്സരിക്കാന്‍ സാധ്യത.സ്ഥിരം തട്ടകമായ പത്തനാപുരം വിട്ട് കൊട്ടാരക്കരയില്‍ മത്സരിക്കാനാണ് സാധ്യത. മൂന്നു ടേം പൂര്‍ത്തിയാക്കിയ ഐഷ പോറ്റി ഇക്കുറി മത്സരരംഗത്തുണ്ടാവില്ല. ഈ സാഹചര്യത്തിലാണ് കൊട്ടാരക്കരയില്‍ ഗണേഷിനെ മത്സരിപ്പിക്കാനുള്ള ആലോചനകള്‍ ഇടത് കേന്ദ്രങ്ങളില്‍ നടത്തുന്നത്. പ്രധാനമായും കെ.എന്‍. ബാലഗോപാലിനെ പത്തനാപുരത്ത് നിര്‍ത്താനുള്ള നീക്കത്തിന്‍റെ ഭാഗം കൂടിയാണിത്.
കേരള കോണ്‍ഗ്രസ് ബിയുടെയും ബാലകൃഷ്ണ പിള്ളയുടേയും തട്ടകമാണ്‌ കൊട്ടാരക്കര. യു.ഡി.എഫിലായിരുന്നപ്പോള്‍ ഈ രണ്ട് സീറ്റിലും കേരള കോണ്‍ഗ്രസ് ബിയാണ് മത്സരിച്ചിരുന്നത്. പത്തനാപുരം വിടാന്‍ ഇതുവരെ ഗണേഷ് സമ്മതം അറിയിച്ചിട്ടില്ല. പത്തനാപുരത്ത് മത്സരിച്ചാല്‍ ജയിച്ചുകയറാം എന്ന ആത്മവിശ്വാസത്തിലാണ് ഗണേഷ്. തദ്ദേശ തിരഞ്ഞെടുപ്പ് മുതല്‍ സി.പി.ഐയും ഗണേഷും തമ്മില്‍ പത്തനാപുരത്ത് അഭിപ്രായഭിന്നത നിലനില്‍ക്കുന്നുണ്ട് എന്നതും ശ്രദ്ധേയം.
